Contractor-te lung lakna ṭha kawhhmuh rêl

Hrangchalkawn-Tlabung inkar kawng (National Highway 54A & 302) laih zauh leh siam hna thawh mekah contractor-in kawng siam nan lung chang ṭha a hman theih nan khawtual mi leh pawlte'n lung lakna quarry ṭha kawhhmuh leh bengvarpui an rêl.

Lunglei additional DC Rochuangkimi Khenglawt, Competent Authority for Land Acquisition (CALA) kaihhruaiin November 8, 2024 khan sorkar hotu te, kawtlang hruaitu te, pawl aiawh te, national highway enkawltu NHIDCL leh NH 54A & 302 (Hrangchalkawn-Tlabung) kawng laih zauh leh siam hna thawk mektu BRNIPL aiawhte an ṭhukhawm a; chak zawka kawng siam theih dan tur an sawiho.

Ṭhutkhawmah hian Hrangchalkawn-Tlabung kawng siam mekah chak tak leh ram leilung leh a chhehvel tana him tura hna thawh a nih theih dan nan ruahmanna an siam. BRNIPL-in hna thawktu an neih zat, khawl an hman zat leh dinhmun kimchang DC-ah theh lut se, contractor-in an hna thawh dan tur ruahmanna felfai tak hunbi ṭhen sa leh thawktu leh khawl an mamawh zat leh an mamawh belh dan turte ruahmanin DC-ah thehlut se, chumi hmang chuan hna an thawh dan uluk taka vil ni se, an ti.

Kawng siam nan lung chang ṭha hman a nih theih nan khawtual mi leh pawlte'n lung lakna quarry ṭha kawhhmuh leh bengvarpui ni se, an ti a; Tlabungah BRNIPL-in site office an neih theih nan hmalak an rêl bawk.

Ṭhutkhawmah hian a kaihhnawih sorkar official te, NHIDCL leh BRNIPL (BRN Infrastructure Private Limited) aiawh te, Hrangchalkawn leh Theiriat local council chairman te, YMA Lunglei Sub-Headquarters President, Lunglei Ṭhalai Pawl hruaitu te, Tlabung Welfare, Lungsen Welfare leh Khawthlang Khawchhuak Welfare aiawhte an tel. Online-in Tlabung SDO (Civil), Lungsen BDO, NH-302 Ngaihven Pawl (Tlabung) leh Landowners Coordination Committee on NH-302 (Lungsen & Rangte VC Area) hruaitute'n an chhim bawk a ni.

Rochuangkimi Khenglawt chuan, Tlabung kawngah fûr chhungin leimin leh chirh tawlh then fai leh kawng chhia thawm ṭhat nan thâ leh tui tam tak an sen avangin hriatthiamna thui tak nen thlir an nih thu a sawi a, "Tunah khua a ro ṭan a, hnathawh hun chhungin chak zawk leh ṭha taka kawngpui zauh leh siam hna thawh zawh thuai a nih ka beisei," a ti.

NHIDCL leh BRNIPL aiawhte'n tun dinhmuna an hnathawh dan leh hmachhawpte an tarlang a; kawng chhe zual lai an ngaih pawimawh hmasak tur thu leh leimin leh chirh then bakah, kawng siam sa fûrin a tihchhiat thawm ṭhatte chu an kalpui ṭan mek thu an sawi.

Official-te leh pawl hrang hrang aiawhte'n an hmalak dan tarlangin, an ngaimawh leh ngaih pawimawh zawngte an sawi bakah, chak leh ṭha zawka hna thawh a nih theih nana rawtna an neih hrang hrangte sawiho a ni bawk.

ṬHUTKHAWMA TARLANTE

* Zangnadawmna pekna tura harsatna la awmte chu thuneitu lam aṭangin chak taka bawhzui mek a ni.

* Kawng hlui kalnaa sorkar ram chin, tuna kawng tharin a kalsante a duh duhin an ta chei loh nan humhalh turin district thuneitute'n chhinchhiaha perh târ an kalpui mek.

* Kawng siam dan leh lung hman chungchangah lung chang ṭha hman leh tui luankawr siam vat a pawimawh.

* Ram leilung, lui leh nungchate'n an tawh loh nan leivung paihna hmun ruahman saah chauh paih a nih theih nan kawng laitu leh leivung paihtute inzirtir zel a pawimawh.