Zemabawk East leh Zote-ah heroin man

Excise & Narcotics department (END) leh Zemabawk East Joint Action Committee (JAC) thawk dun chuan November 9, Inrinni khan Zemabawk East huam chhungah heroin (no. 4) kg. 3.734 (hawng 314) an man a; Assdam Rifles-in heroin gram 129.35 an man bawk.

END leh Zemabawk East JAC-te chuan November 9 zing dar 3:30 khan Zemabawk East-a Kanan Thar vengah heroin kg 2.557 (hawng 220) leh a neitua puh mi pahnih - Thangmuansein (30) s/o Kaikhanpau leh Thangkhansawm (22) s/o Vialsuanthang, Tuithang, Tiddim, Myanmar-a khawsa ve ve nia inchhalte an man.

November 9 vek khan zing dar 6:30 khan Zemabawk East Kanan Thar vengah tho SowabUddin (23), Patharkandi, Karimganj district, Assam nia inchhal hnen aṭangin heroin kg. 1.177 (hawng 94) an man bawk.

END leh Zemabawk East JAC-te'n heroin an man zawng zawng hi kg 3.734 (hawng 314) a ni a; heroin neitute lakah Narcotics Drugs & Psychotropic Substances Act, 1985 tlawhchhanin thubuai ziah luh niin, November 9 vek khan Special Court (NDPS Act), Aizawl District Court-ah an thawn nghal a ni.

Assam Rifles sipaite chuan November 8, 2024 khan Champhai Zote huam chhungah Zolawmsanga (24), Myanmar lam mi nia insawi hnen aṭangin heroin no. 4 gram 129.35 an man bawk.