Thlai lei leh hralh dan tur inzirtir

Mizoram sorkar flagship programme, Bana kaih (Handholding) Scheme hnuaia thlai lei leh hralh chungchangah November 8, 2024 khan Saitualah orientation training buatsaih a ni. Hnahthial District Agricultural Marketing Committee (DAMC) chu hmalak dan tur thlirin an ṭhukhawm bawk.

Saitual DC conference hall-a multipurpose farming society chairman leh secretary-te tana buatsaih orientation training hi district bawrhsap Dr Lalngura Tlau, DAMC chairman ni bawkin a hmanpui.

Dr Lalngura Tlau chuan, Saitual chu sawhthing intodelhna district a nih thu sawiin, "Sorkar policy thar hi kan hlâwkpui ngei ka beisei. Thlai thar lei/hralhna hmun (secondary collection centre) chu Saitual district-a hmun pathum - Saitual, Keifang leh Hliappuiah a awm a, society 44 din tawh zinga pahnih an inziak lut tawh," a ti a; rinawmna, dikna leh taimakna hmachhuana theihtawp chhuah turin society hotute a chah.

Saituala training hi DAMC member secretary A Lalhmachhuana'n a kaihruai a; DCSO Zairemkima'n DAMC kalphung leh inkaihhruainate a sawifiah. DCO SK Das chuan secondary collection centre inrelbawl dan tur leh 'Record keeping & book of Accounts' a sawizau a; DHO Jacob Lalmalsawma'n sawhthing leh aieng thliar dan a zirtir bakah, RO (Soil) Peter Biakthansanga'n hmunphiah thliar dan a sawifiah a bawk.

Hnahthial DAMC chu an chairman Rita Lalnunmawii Pachuau, bawrhsap hoin DC meeting hall-ah an ṭhukhawm a; DC chuan, kut hnathawktute tibeidawng lo turin theihtawp chhuah tlân a ṭul thu a sawi.

Rita Lalnunmawii chuan, sorkar scheme tihlawhtling turin an mawhphurhna ṭheuhte ṭha taka hlen tura ṭan lak a ṭul thu a sawi a, "Thlai thar chhuaktu leh kut hnathawktute thlai thar chhuah suma chantir tura hmalak hi thil pawimawh tak a ni," a ti.

Ṭhutkhawmah hian Hnahthial district-a sorkar hotute bakah, Handholding Scheme thawhpuitu SBI, MRB leh Apex Bank aiawhte an tel. primary society chungchang te, secondary collection centre thlan leh ruahman chungchang te, society thlante hnena zirtirna (sensitization) neih chungchangte leh thil pawimawh dangte sawiho a ni.