MNF-in Mizo nu hâl hlum an dem

MNF party chuan thuchhuah siamin, November 7, 2024 zan dar 9 velah Meitei hoin Zairawn, Jiribam district, Manipur an runnaah Zosangkim Hmar (31) w/o Ngurthansang Hmar an sawisak hnua an hâl hlum chu an dem thu an tarlang.

MNF chuan, Zo hnahthlakte chenna khua Zairawn chu Meitei hoin an rûn tih tarlangin, "Pi Zosangkim Hmar nasa taka nghaisain, râwng takin an hâl hlum a ni. Hetiang nunràwnna kan unaute chunga a thleng hi pawi kan ti tak zet. A kalsan tak a pasal leh a fate (pathum) leh a chhung khat lainate Pathianin awmpui mawlh rawh se," an ti.

Manipur-a Zo hnahthlak leh Meitei inkarah boruak ṭha a awm chhoh mek tawh laia Zairawn khuaa thil rapthlak tak mai a thleng chu pawi an tih thu sawiin MNF chuan, "Meitei-te hian lungrual taka awm tlan a, remna neih an duh loah kan ngai," an ti a; pawi khawihtute chu an phu tâwka hrem ngei ni se an duh thu an sawi.

MNF chuan, khawvela Zo hnahthlakte lungrual lehzuala hma lam pana kal a hun tak zet nia sawiin, "Hnam anga beihna kan tawhna nasa chho tulh tulh hi lungrualna ṭha nena Zo hnam zawng zawngte'n kan lo hmachhawn a ngai a, unau kan nih hria a, lungrual taka ke pên turin Zo hnahthlak zawng zawngt kan sáwm a, Zo hnam puanzar hnuaiah ram leh hnam tan inhlan thar turin Zo fa tawh phawt chu kan ngen a ni," an ti.