Zoram kalsiam din thar leh a, kalphung thar dik taka kal kan tum - Lalthansanga

Minister Lalthansanga chuan, November 9, Inrinni khan a bial, Aizawl East-I chhunga Sihphir khuaah mipui tan dàwr theih turin hun a hmang a, mimal leh pawlte'n an harsatna leh mamawhte an lo thlen. Minister chuan, Zoram kalsiam din thar leh a, kalphung thar leh dik taka kal an tum thu a sawi.

Lalthansanga chuan, mi tinin an dikna chanvo an chan chu an duhthusam a nih thu leh kalphung pawh zawi zawia a dik chhoh thu a sawi a, "Zoram kalsiam hi dinthar leh a, kalphung thar leh dik taka kal kan tum a, chumi tur chuan huaisen takin, sawisel pawh huamin hma kan la mek a ni," a ti.

ZPM sorkar hnuaiah chuan hna a ṭha tur a ni tih sawiin Lalthansanga chuan, "Hna ṭha lo chu sorkarin hna endik tura a din State Monitoring Committee-in an ûm zui zel dawn. Hna vil chungchangah, sorkar kuta dah pumhlûm mai loin, mi tinin kan mawhphurhna a ni tih hria ila, kan hotute hnenah rang taka report nghal zel tur a ni," a ti a; mipui nen an ṭan tlan chuan hmasawnna ro tling neih theih ngei a beisei thu a sawi.

Lalthansanga chuan, ṭhalai lehkhathiam leh taima, mahni kea dinchhhuah tumte'n bul an ṭan theih nan a pung awm lo loan an lak theih tur ruahman a nih thu a sawi a, "Handholding hi pawisa sem a ni ve lo a, Chief Minister Special Package pawh grant a ni a, mi taima leh thawk rimte tana chhawrnahawm tak tur a ni," a ti.

Minister Lalthansanga hian Sihphira MLA fund hmanga hnathawhte a hmunah a enfiah nghal bawk.