Ruihhlo do beihpui thlak hun hmang

Chhiahtlang Kawnveng Welfare Committee leh tlawmngai pawlte chuan November 9, Inrinni khan Chhiahtlang Bazar kawtah ruihhlo do beihpui thlak hun an hmang a, mipuite'n an huam chhunga zu leh ruihhlo zawrh an duh lohzia an lantir.

Ruihhlo do beihpui thlak puala inkhawm chu Chhiahtlang Kawnveng Welfare Committee chairman R Lalremchhunga'n a kaihruai a, Chhiahtlang South VC president K Lalbiakmawia leh bialtu pastor-in thu an sawi.

Mipui pungkhawmte chu zu leh ruihhlo zuar ṭhinte'n sima zuar tawh lo tura an duh thu te, zu leh ruihhlo an do zel dawn thu te, khawtlang ngenna zahlo chu an veng chhuahsan mai tura an duh thu te, sorkar phal loh zuartute chu na taka hrem an phût thutein an au rual a; ruihhlo dona thuziak an keng bawk.

Chhiahtlang Kawnveng Welfare Committee Lalruatfela chuan, an hun hman chu a bul ṭanna chauh a nih thu sawiin, an veng chhunga zu leh ruihhlo zuar lui zel an awm chuan na zawka hmalak an tum thu a sawi.