ZPM kaihhruai sorkarin sum a enkawl chinah hmasawnna a awm - ZPM party

ZPM chuan, sorkar sum kum 2024-25 kal meka kum chanve, April-September chhunga Mizoram sorkarin leiba tel loa sum a hmuh tawh zat chu vbc. 4,093.67 a nih thu leh, ZPM party kaihhruai sorkarin Mizoram sum an enkawl chinah hmasawnna a awm niin an tarlang.

ZPM party chuan, April-September, 2024 chhunga Mizoram sorkarin leiba tel loa sum a hmuh chu vbc 4,093.67 a ni tih sawiin, "Budget estimate aṭanga 33% hmuh tawh a ni a, nikum tun ang hunah khan 27.97% hmuh a ni. Chhiah aṭanga sorkar sum hmuh tawh vbc. 2,834.08 niin, beisei zat aṭanga 38.24% a ni a, nikum kum chanve chhung khan beisei zat aṭangin 36.51% hmuh a ni," an ti.

Mizoram sorkarin sum a pûk tawh zat chu vbc 1,058 a nih thu sawiin ZPM chuan, "Kumin financial year-a pûk tur beisei zat aṭangin 77% pûk tawh a ni a, nikum tun ang hunah khan vbc 1,871 lai, pûk beisei zat aṭanga 147.22% lawih pûk a ni," an ti a; kum chanve chhunga sum puk chu nikum aiin kuminah vbc. 800 chuangin a tlem zawk niin an sawi.

ZPM chuan, Open Market Borrowing aṭanga thla tina sorkarin sum a pûk chu budget-ah dah sa thlap a nih thu sawiin, "Mamawh thar thut vanga pûk ni loin, kan sum hmuhna hnarin a daih loh hmasawnna ruhrel dinna tur leh leiba sum lu rulhna atana pûk tura ruahman a ni," an ti a; kumin chhungin leiba sum lu ringawt vbc 460 leh a pung vbc 604 rulhna tur budget pass tawh a nih thu an tarlang.

ZPM chuan, Mizoram sorkar sum dinhmunin hun rei tak ṭhat lam a pan hlei thei lo nia sawiin, "Budget vawi khat pawh la pharh ngai lote'n Mizoram sum an enkawl ve chinah erawh hmasawnna thar kan hmu ta hi lawmawm kan ti. Finance department changtu chief minister Pu Lalduhoma leh adviser to CM (Finance) Pu TBC Lalvenchhunga bakah, Finance department-a thawkte chungah lawmthu kan sawi a ni," an ti.