KHAWTHLIR

KṬP-in thisen pe

November 9, Inrinni khan KṬP, Ramthar Veng Bial chuan ZMC blood centre tan thisen unit 61 an pe a, petute mipa 57 leh hmeichhia pali an ni. KṬP, Kanan Veng Branch pawhin an kum 35 tlin, coral jubilee pualin Synod Hospital tan unit 40 an pe a, petute mipa 35 leh hmeichhia panga an ni.

Voters awareness Free health camp

Saitual district election officer leh SVEEP nodal officer-te chuan November 9, Inrinni khan Maite VC House-ah 'Voters Awareness Free Health Camp' an buatsaih. He hunah hian inentir tura kal khawmte chu electoral roll ennawnna, Special Summary Revision 2025 chhunga electoral roll-a inziah luh leh EPIC tihdanglam ngaite tana hriat tur pawimawhte hrilhfiah an ni.

NCD campaign

Lunglei additional DC James Miahlung hoin November 8, 2024 khan a pisaah Mizoram Health System Strengthening Project bultumin Lunglei district-a thingtlang khuaa natna inkai chhawn theih loh, non-communicable disease (NCD) chungchang inzirtirna leh hri danna pek (routine immunisation) kalpui kawp dan tur sawiho a ni. November 2024 thla chawlhkar hnihna aṭangin thingtlangah special NCD campaign kalpui an rêl.

Mei zu 11 man

Lunglei District Anti Tobacco Squad chuan November 9, Inrinni khan Lunglei Sobji Bazara puipunna hmunah mei zu an awm leh awm loh an endik a, phal lohna hmuna mei zu mi 11 manin, pawisa an chawitir. Mi 11-te pawisa chawi chu Rs 1,050 a ni. Lunglei District ATS hian tun hnai hian Lungleia sorkar pisa hrang hrangah mei zu an lo vai tawh a, mi eng emaw zat manin pawisa an chawitir a ni.

Duhsakna hlan

Champhai SP Shivendu Bhushan chuan thuchhuah siamin, Ministry of Home Affairs-in Kendriya Grihmantri Dakshata Padak (Union Home Minister Efficiency Medal) in Investigation dawng tura a thlan Champhai Police Station-a sub-inspector Liansangpuii chu Champhai District Executive Force-in an lawmpui thu a tarlang a, "A kal leh zelna turah duhsakna sang ber kan hlan a ni," a ti.