Zirtirtu entawntlak loh an awm - Education Minister

December 5, Inrinni khan Hnahthialah district education office (DEO) leh Samgra Shiksha district project office hawn a ni. Pisa hawngtu School Education minister Lal­chhandama Ralte chuan, zirtirtu entawntlak loh eng emaw zat an awma a hriat thu a sawi.School Education Minister chuan, zirtirtute file chu mihring an nih thu sawiin, "Zirtirtu hna hi hlawh hmuhna atan chauh ni lo, missionary rilru púin thawk ila, DEO kan hawn thar hian kan zirna quality ṭha thlen se. Zirtirtu ṭha leh fel tak tak an awm laiin, entawn tlak loh eng emaw zat an awm niin ka hria," a ti.

Lalchhandama Ralte chuan, Covid-19 avangin sum leh pái a harsat thu sawiin, "Duh angin hmalakna a chak thei lo. Chutiang karah district ban pawimawh tak DEO leh DPO Hnahthialah hawn a ni leh hawng theia ka awm hi Pathian hnenah pawh lawmthu ka sawi a ni," a ti a; ram hmasawnna atan human resource development chu a bulpui ber a nih thu a sawi.

An department hnuaiah hna thar 1,800 vel lâk a nih thu sawiin Minister chuan, "Tih tur erawh tam tak a la awm a, kan ti zel ang. Tun dinhmuna thawktu awm ang angte hian ṭhahnemngai takin i thawk ang u. Education department ram leh building awm ang angte mahni ta anga enkawl ṭheuh turin mipui ka ngen. Kan ram leh hnam tana hmun pawimawhah min ngaihsak rawh u," a ti.

Minister of state TJ Lalnuntluanga pawhin thu sawiin, thiamna avanga tling ni lo, tute emaw puihna avanga tling tura inhriatna chu a ṭha lo a, nuaibo a ngai tih a sawi a, "Degree neih ringawt hi a tâwk lo a, tling thei tura thiamna tak tak neih a ngai," a ti a; moral development chu zirna-in aṭanga bul ṭan ngai a nih thu a sawi.

Inkhawm hi Hnahthial DC Vanlalmawia'n a kaihruai a, Samagra Shiksha state project director Lalhmachhuana pawhin thu a sawi a ni.