Minister Zodintluanga'n MCS officer-te Neitu rilru púa hna thawk turin chah

Minister Zodintluanga chuan nimin khan MCS officer-te hmaah thu sawiin, sorkar officer leh thawktu dangte zingah an nihna anga hriat ngaite hre lo leh hriat tum lo an tam thu a sawi a; sorkar hnathawkte chu neitu rilru pua hna thawk turin a chah.

Mizoram Civil Service Association (MCSA) leh DP&AR chuan nimin khan Assembly Annexe conference hall-ah MCS-te tan 'Resource mobilisation and fiscal discipline' tih thupui zirhona an buatsaih a; UD&PA minister Zodintluanga'n khuallian niin a hmanpui a ni.

Zodintluanga chuan, "Sor­kar officer-te zingah sorkar hnathawk leh officer nih anga hriat ngaite hre lo an awm a, hriat tum lo leh mi hriat tura dah an tam. Sorkar sum enkawlnaah mawh ka phur ve a ni tih ngaihtuah lo an tam," a ti a; seminar chu MCS officer-te'n sorkar sum enkawl kawngah an ṭangkaipui ngei a beisei thu a sawi.

Sorkarin sum hman tur a neih theih nana pawimawh hmasa chu sum lak luh dan kawng zawn a nih thu sawiin, Zodintluanga chuan, sorkarin kawng hrang hrangin sum lak luh dan a zawn thu a sawi a, "Revenue nei ṭha lo kan ni a, Central sorkar hi kan sum hmuhna ber a ni lo thei lo. Sorkar sum hâi luh dan zawn zel a ngai a, foreign funding thlenga hai luh dan ngaihtuah zel a ṭha a ni," a ti.

Sorkar sumte chu daihzai taka hman thiam a ṭul thu sawiin, Sports Minister chuan, "Sorkar­in sum a neih sate ṭangkai tak leh daihzai taka hman a ngai pawimawh a, ṭul loa sum senna tam tak, subsidy-te pawh tihtlem mek zel a ni," a ti a; MCS officer-te chu sum renchem thiam turin a chah.

Sorkar sum hman danah mipuite thîkthu a chhiat tial tial thu sawiin, Zodintluanga chuan, "Sorkar sum hi kan zavaia ta a ni a, neitu rilru púa ren taka hman a ngai. Chutiang tur chuan MCS-te'n tih theih in nei a ni," a ti.

MCS-te puala seminar-ah hian chawhma lamah Mizoram University Economics department-a zirtirtu Prof. Vanlalchhawna'n 'Centre-State Financial relations & Central Finance Commission' tih leh, UD&PA joint director Vanlalmawia'n 'Fiscal Management & Fiscal Policy' tih an sawi a; chawhnuah senior deputy accountant general Frederick Syiemlieh-a'n 'Financial Property in Government' tih leh, DRDA Champhai project director CC Lalchuangkima'n 'Resource Mobilisation in Government' tihte an sawi a ni.