Horticulture Minister-in grape tui a vai liam

Horticulture minister PC Lalthanliana chuan May 14 khan Champhai Grape Growers' Society (CGGS)-in grape tui an sâwr (grape juice concentrate), Radiant Manufacturers Pvt. Ltd. hnena an hralh hmasak ber tur litre 16,000 chu Tlangsam Winery aṭangin a vai­liam. May 14 vêk khan Champhai Tlangsama Turmeric Processing Centre a tlawh bawk.

Horticulture Minister chuan, grape chíngtute thawhrimna leh hmalakna chu entawntlak a tih thu sawiin, grape tui an sâwrah dik taka thil ti a, quality ngaih pawimawh turin a chah a, "Kuthnathawktute dâwm kân hi sorkar tih tur ni mah se, mahni kut leh theihna hmanga thawh ve theih china sorkar thawhtir ṭâlh tuma panchan erawh bansan a ngai a ni," a ti.

Grape tui vailiamna inkhawmah hian parliamentary secretary TT Zothansanga leh Horticulture director R Zotawna te pawhin thu an sawi. Radiant Manufacturing hotute'n thu an sawi bawk.

CGGS-ah hian chhung­kua 279 an inziak lut a, kum 2010-ah an grape tharte an hralh ṭan a; Radiant manufacturers nena an thawh dunna hi kum hnih chhung atana tih phawt a ni. Grape tui chu litre khatah Rs. 50-in Radiant company-in an leisak a, brand name chu Vinho Porto Port Wine tih a ni.

Horticulture Minister hian May 14-a Tlangsama Turmeric Processing Centre a tlawhnaah Turmeric Growers' Society member-te nen an inkâwm a; Turmeric Growers Society-te hnathawh leh Horticulture department-in hma a lakpuina chu fakin, "Ram pawna mi lei ngai loin mahni thar ngei aieng hman mai theiha siam a ni hi a lawmawm a ni," a ti.