Champhaiah hmeichhe V/C-te chawimawi

MHIP sub-headquarters, Champhai chuan nimin khan Champhai Venglai community hall-ah Champhai khawpuia village council member atana hmeichhia thlan tlinte chawimawina hun an hmang a, Home minister R Lalzirliana'n hmanpuiin, hmeichhe V/C-te chu an hmabak a an mawhphurhnate ṭha taka hlen­chhuak turin duh­sakna a hlan.

Minister R Lalzirliana chuan, roreltu dinhmuna dingte'n nun dan tawk an hriat a pawimawh thu sawiin, mahni chauh in­ngaih­tuaha thil tih theihna hmachhuan vak chingte'n ngaihsan an hlawh loh thu a sawi a, "Rinawmna nen Pa­thian hre reng chunga kan hnam nun chawisang chung­a mawhphurhna hlenchhuah chu kan nihnain a phût a ni," a ti.

R Lalzirliana chuan, sorkarin hmeichhe din­hmun siamṭha tura hma a lak ṭhin thu sawiin, Assembly House-in The Mizoram Marriage, Divorce and Inheritance of Property Act a pass tawh thu leh, V/C in­thlana hmei­chhe tana seat hauh chu hmei­chhiate tan chanchin lawm­awm a nih thu a sawi.

Home Minister chuan, zu chungchang sawiin, kum tam tak chhung MLTP Act hman a nih chhungin zu lei tur a awm reng a, sualna a tam reng tho tih a sawi a, "Zir chiang tur committee din a nih hnuah MLPC Act chhawpchhuah a ni a, he dan hian mi lian leh mi tê a thliar lo a, dan bawh­chhia an nih phawt chuan mi thil ti thei leh thei loin awmzia a nei lo," a ti.

Champhaia hmeichhe V/C-te chawimawina inkhawmah hian parliamentary secretary TT Zothansanga, Champhai North bialtu MLA leh ZOHANDCO chairman R Vanlalvena, MLA-te pawhin thu an sawi a ni.

Champhai district-ah hian V/C atana thlan tlin hmeichhia 125 an awm a, Champhai MHIP-te chuan chawimawina thuziak an hlan a ni.