Mizoramah vawk 3,66,646 vulh mek

16th May, 2015

DoNER secretary R Vijay Kumar chuan nimin khan Selesiha Animal Husbandry & Veterinary department enkawl vawk vulhna leh enkawlna hmun a tlawh. AH&Vety department chuan, tuna Mizoram puma vawk vulh zat chu 3,66,646 a nih thu an tarlang.

DoNER Secretary hian nimin vek khan vawk chi lakna Regional Boar Semen Station leh AH&Vety directorate thlanga ran damlo enkawlna tur Polyclinic sak thar a tlawh bawk a; AH&Vety hotute'n Mizoram vawk vulh dinhmun leh department hmalak dante an lo hrilh a ni.

AH&Vety department chhinchhiah danin, tuna Mizoram puma vawk vulh zat chu 3,66,646 a ni a; kum 2014-15 chhung khan vawksa mamawh zat chu ton 14,543 a nih laiin, Mizoram chhunga deh chhuah zat chu ton 12,525 a ni.

Kum 2014-15 khan vawk chi 4,891 sem a ni a, a hralhna aṭangin Rs. 3,25,100 hmuh a ni. AH&Vety directorate thlanga Vety Polyclinic sak mek chu DoNER sum nuai 347.26 hmanga sak a ni a, hawn theih thuai tura beisei a ni.

DoNER Secretary hi DoNER adviser (Agriculture & Allied) M Iboyaima Meitei-in a ṭawiawm a; vety hmun an tlawhnaah hian AH&Vety secretary K Lalnghinglova bakah Planning leh AH&Vety hotute'n an kaihruai a ni.