ZORO leh TIPM hruaitute inkâwm

ZORO General Headquarters hruaitute leh Thangram Indigenous Peoples Movement (TIPM) hruaitute chu December 5, Inrinni khan ZORO president R Sangkawia kaihhruaiin ZORO pisaah an inkâwm.

R Sangkawia chuan, ZORO duh ber chu, khawvel hmun hrang hranga Zo fate inlungrual leh inpumkhata ram rorelna pakhat hnuaia a awm a nih thu sawiin, "UNO kan dàwr ṭhin a, UNO aṭangin lehkha kan hmu tawh a, in luah chin ram map lo siam ula, in rawn thehlut dawn a ni, min ti a ni," a ti a; Zoram map siamin UNO-ah an thehluh tawh thu a sawi. TIPM chu puih theihna an neih chuan theihtawp an chhuah tur thu a sawi bawk.

TIPM president K Vana Chorei chuan, "Mizoram kan lo kal hi thil dil tura lo kal kan ni lo a, kan nu leh pate bèl tur leh kan awmna hi Mizoram a ni tih puangzar tura lo kal kan ni," a ti a; Thangram chu Mizoram a nih thu sawiin, chu chu hriatpuia pawmpui turin Mizoram mipui a sáwm.

K Vana Chorei chuan, "Kan awmnaah hian rinawm takin kan lo ding tlat ang a, Zoram mipui hian min chhan ngam dawn em tih hi kan rilruah a lian hle. Min chhan ngam ngei kan ring a, kan hmuh dan pawh a ni," a ti a; Mizoram mipui chu ṭanrualpuiah a sáwm.

Thangram huam chhungah Zo hnahthlak chi pêng hrang hrangte khaw 24 an awm a, chu'ngte chuan October 2020-ah TIPM an din a ni.