Workshop buatsaih

Nimin khan Siaha DC Bhupesh Chaudhary hoin Indian Chamber of Commerce, North Eastern Council, Ministry of DoNER, Siaha DC Office leh Siaha BDO Office-te chuan DC conference hall-ah 'Workshop on financial inclusion' neih a ni. MTP, MCHP leh MSO hruai­tu te, loneitu te, V/C te, sumdawngte leh self help group member-te an tel a; Siaha district-a bank-te leh Social Welfare department-a mithiamte'n sorkar scheme chi hrang hrangte leh bank loan chungchang an sawifiah.

Ministry of Home Affairs ṭhupek angin, Aizawl DC pisaa Arms Branch-ah Aizawl district-a silai license nei, Unique Identification Number (UIN) digit 18 la nei lote tan June 26, 2020 thleng tihfelna hun hawn a ni. Hun tiam chhunga tifel lote chu an silai license tihtawpsak an nih tur thu sorkar thuchhuahin a tarlang.

Nimin khan Aizawl DC Vanlalngaihsaka, district election officer kaihhruaiin DC conference hall-ah electoral roll ennawn mek sawiho a ni a, special summary revision-a mawhphurhna nei te, political party leh tlawmngai pawl aiawhte an tel. Report-a a lan danin, ERO leh AERO-te'n dilna 15,000 chuang an enfiah mek a ni.