Candidate tur la hmuh kim loh vangin Sorkarin AMC inthlan a la hawi thei lo - ZPM Vice President

ZPM vice president K Sapdanga chuan, Aizawl Municipal Corporation (AMC) term a tàwp ṭêp tawh laia sorkarin inthlan lam a hawi theih loh chhan chu, hripui lêng vang ni loin, candidate tur an la inhmuh kim loh vang a nih thu a sawi.

Aizawl West-II ZPM Block-in December 5, Inrinnia an huam chhunga local council member atana tlingte lawmpuina Dinthar venga an buatsaihah thu sawiin K Sapdanga chuan, "AMC term a tàwp mek laiin sorkarin inthlan buatsaih lam a hawi theih loh chhan hi hripui lèn vang ni loin, ruling party-in candidate an la hmuh kim loh vang niin a lang a, a zia lo hle. Sorkar hian an party tana remchang a zawnna lamah mipui hriselna lam bosal a chíng ṭhin hi sim tawh turin kan ngen a ni," a ti.

ZPM Vice President chuan, MLA aṭanga Lalduhoma paih a nih chhan sawiin, "Sorkar khalh ngìl kawnga ṭhahnem a ngaihna kha sorkar lamin a tlin loh vang ni berin a lang a, Pu Lalduhoma ang hi ramin a mamawh dik tak a ni," a ti a; ram rorelnaa a tel leh thuai theihna turin MLA-a hláng kaitu Serchhip mipui kuta tlûk luh kan thlang a, court-a kal an tum lo tih a sawi.

Lalduhoma hêktu MNF MLA 12-te leh bànna thupek siamtute'n Mizoram politics chanchinah a chhe záwngin an hming a chuang kumkhua tawh dawn tih hre mah se, hreh tak chungin an ti lo thei si lo tih sawiin Sapdanga chuan, "Kan lainat hle a ni. Pu Lalduhoma bàn a nih dan hi Mizoram mipuiin kan pawm lo. Dikna kan ṭan tih mipuite'n kan lantir ngei ang tih ZPM chuan kan beisei a, thuneitute'n a rang lamin by-election buatsaih se kan duh a, kan ngen nghal a ni," a ti.