Innei thar tuak 2,776 sorkarah inziak lut
The Mizoram Compulsury Registration of Marriages Act, 2007 hnuaiah sorkar kum kal ta, 2014-15 chhung khan innei tuak 2,776 an inziak lut a, Kristian 2632 leh Kristian ni lo nupa tuak 144 an tel.
The Mizoram Compulsury Registration of Marriages Act, 2007 hnuaiah hian Mizorama inneite reng reng chu sorkarah an inziak lut ngei ngei tur a ni a, innei tharte sorkara inziah luhna dan hi a takin April 1, 2008 aṭangin hman ṭan a ni.
Inneite sorkara inziah luhna tur hian Law & Judicial department chuan khua leh veng tinah innei chhinchhiahtu, registrar of marriages a dah a; innei tharte reng reng chu dan angin registrar of marriages hnenah an inziak lut ang a, registrar chuan Marriage Certificate a lo pe tur a ni.
Sorkar kum liam ta, April 1, 2014 aṭanga March 31, 2015 chhung khan Mizoram chhungah innei tuak 2,776-te chu The Mizoram Compulsury Registration of Marriages Act, 2007 hnuaiah an inziak lut a; chung zinga tuak 2,632 chu Kristian niin, tuak 144 chu Hindu leh Buddhist mite an ni.
Innei thar sorkara inziak lut hi Aizawlah tam berin, tuak 1,454 an ni a, inziak lut tlemna ber Saiha district-ah chuan tuak 65 chiah an inziak lut.
District panga - Aizawl, Kolasib, Champhai, Serchhip leh Saiha district-ahte Buddhist sakhaw zuitu inziak lut an awm lo a, chutih laiin Lunglei, Lawngtlai leh Mamit district-ahte inziak lut tuak 110 an awm. Buddhist sakhaw zuitu inneite hi Chakma an ni tlangpui niin Law & Judicial department-a hotute chuan an sawi.
Hetih lai hian, Hindu sakhaw zuitu innei inziak lut hi Aizawl district leh Lawngtlai district-ah tuak 34 an awm a; district dang zawngah an awm lo thung.