MSU President-in bail a dilna, thubuai pakhatah hnâwl a ni

Anti Corruption Bureau (ACB) leh Aizawl Police Station-in November 8, 2024-a an man Mizo Students' Union Gen. Hqrs president Samuel Zoramthanpuia bail dilna chu nimin khan Aizawl District Court-ah ngaihtuah a ni a, thubuai pakhatah phalsak a nih laiin, thubuai pakhat zawkah hnawl a ni.

Samuel Zoramthanpuia bail dilna hi Aizawl District Court-a Chief Judicial Magistrate (CJM) mawhphurhna latu judge-in November 8, 2024 tlai khan a ngaihtuah a, a hnâwl. Nimin khan CJM-in a ngaihtuah ve leh a, ACB-in thubuai an siamsaknaah bail a phal a, Aizawl PS-a a thubuaiah erawh chuan bail a phal lo.

Tarlan tawh angin, Samuel Zoram­thanpuia hi ACB chuan sum tihchingpen thubuaiah November 8, 2024 khan an man a; hemi ni vêk hian Aizawl PS chuan mi hrên beh (kidnap) leh tihluihna hmanga pawisa chhuh (extortion) thubuaiah an man ve bawk.