Zo hnahthlak ráltlânte chungchang CYMA-in Home Minister-ah an thlen

Central YMA office bearer-te chuan an president Lalhmachhuana hoin nimin khan Home minister K Sapdanga a pisaah an hmu a; Mizoram páwn aṭanga Zo hnahthlak ráltlânte chungchang leh thil dangte an thlen.

CYMA hruaitute chuan, tun hnaia YMA Sub-Headquarters, Champhai huam chhunga Myanmar raltlante khawsakna inte chu sorkar lamin an hman a ṭul dawn tâk avangin relief camp thar sakna tur sum Disaster Management & Rehabilitation department aṭanga pe tura dilna lehkha DMR minister ni bawk K Sapdanga hnenah an pe. Minister chuan, a rang thei ang bera hmalak a nih theih nan committee ṭhutkhawm koh a nih tur thu a lo hrilh.

Myanmar buai avanga Zo hnahthlak raltlan mi eng emaw zat Manipur state chhunga jail-a hrên mekte chungchangah CYMA hruaitute chuan, jail-a tángte chu Mizorama lâk chhâwn theih dan kawng dap turin Home Minister an ngen a; Minister chuan, police hotute nen an lo sawiho tur thuin a chháng.

CYMA hruaitute chuan, MSU President man a nih chungchangah, dân chunga léng an awm loh rualin, zirlai pawl leh hruaitute inkarah te, sorkar nena inkarahte boruak ṭha lo a awm loh nan ngaihtuahna fím tak nena kalpui ṭul an tih thute Home Minister hnenah an sawi a; hemi chungchangah hian Home Minister lakah an lawm hle thu CYMA chuan an tarlang.