KHAWTHLIR
KṬP-in thisen pe
KṬP, Bilkhawthlir Branch chuan nimin khan an kohhran hall-ah thisen pek an huaihawt a, Kolasib District Hospital tan thisen unit 32 an pe a, petute mipa 23 leh hmeichhia pakua an ni.
Zero Tolerance
Lawngtlai district transport officer Margaret J Vanlalremmawii chuan thuchhuah siamin, December 2- 13, 2024 chhungin 'Zero Tolerance Week' hman a nih dawn thu a tarlang. DTO chuan, Week hman chhungin lirthei lehkha pawimawhte leh driving licence-te pai/keng reng turin lirthei khalhtute a chah a; helmet khum turin two wheeler khalhtute a hriattir bawk.
Mei zu man
Champhai MVI leh District Tobacco Control Cell chuan tun hnai khan Champhai Dawrkaikawn leh Bethel Veng inkarah mihring phur sumdawnna lirthei (public transport)-ah mei zu an awm leh awm loh an enfiah a; dan bawhchhia mi pathum manin, pawisa an chawitir. Taxi, auto rickshaw leh two wheeler taxi khalhtute hnenah an lirtheia bel tur 'No smoking' sticker an sem nghal bawk.
MNF inkhawm
MNF party chuan nimin khan an pisa, Mizo Hnam Rûnah inkhawm an nei a, MNYF hruaitute'n hun an hmang. Inkhawm hi MNYF generel secretary V Vanlalchhanchhuaha'n a kaihruai a, generel secretary dang Dennis Vanlalmawia'n thu a sawi a ni.
Tuitla ruang hmu
October 9, Inrinni chawhma dar 11 vela Ṭiau lui, Bungkhaw kaia tla Mary Vanlalnunpuii (21) w/o Francis Lalramnghaka ruang chu nimin chawhnu dar 2:40 vel khan a tlâkna aṭanga metre 100 velah hmuh a ni. Ruang zawng hian Thingsai leh Buang, Myanmar mite an thawk chhuak a ni.
AR-in meth man
Assam Rifles sipaite chuan nimin khan Zokhawthar leh Mélbûk inkarah Swift Dzire car MZ-01 F-6155 aṭangin methamphetamine kg. 2.399 an man. Car hi AR sipaite'n an lo tihdin hmain a ding a, a chhunga chuangte an tlanchhia a ni. AR sipaite hian November 10, 2024 khan Zokhawtharah ram dang aṭanga lak luh e-cigarette 339 an man bawk.
Kawlphetha awm dawn lo
Power & Electricity department chuan naktuk zing dar 9 aṭanga tlai dar 4 thleng 132KV Sub-Station, Sihhmuiah hna an thawk dawn tih an tarlang. P&E department tarlan danin, hna thawh hun chhungin Sairang, Khamrang, Sihhmui, PTC, Lengpui, Airport, ISPAT, SIPMIU leh khawthlang lam - Mamit district-a khuate'n kawlphetha a hmu thei dawn lo.