Thla 9 chhungin lirthei dan bawhchhia 7,887 man a ni

Aizawl Traffic Police chuan kuminah January-September chhungin lirthei dan bawhchhia 7,887 an man a, dan bawhchhiate pawisa chawi zat chu Rs 54,71,902 a tling.

Traffic Police hotute hnen aṭanga Vanglaini thu dawn danin, kuminah dan bawhchhe zat an dah khawm tawh chin, January-September thla chhung khan lirthei dan bawhchhia 7,887 man a ni. Man zingah two wheeler tam berin, 5,474 a ni a, man zawng zawng aṭangin 69.41% a tling.

September 1, 2022 aṭanga The Motor Vehicles (Amendment) Act, 2019 hman a nih aṭangin lirthei dan bawhchhiate'n dan an bawhchhiat azirin pawisa chawi a pung nasa a; kumin chhunga lirthei dan bawhchhia 7,887-te pawisa chawi zat chu Rs 54,71,902 a ni.

Kuminah July thla khan lirthei dan bawhchhia man tam berin, 1,131 man a ni a, chu'ng mite pawisa chawi zat chu Rs 7,86,700 a ni. Lirthei dan bawhchhia man tlem ber thla April-ah 734 man a ni a, chu'ng mite pawisa chawi zat chu Rs 4,65,200 a ni.

Traffic SP Stephen Lalrinawma chuan, dan zawm hi khua leh tui ṭha ni tura tih tur pawimawh a nih thu sawiin, dan zawm turin lirthei khalhtute a chah a ni.