Global Model Site atan Thenzawl thlang

Tourism department buatsaih District Wise Tour Itinerary Creation Competition-a Serchhip district-in pakhatna a nih chu nimin khan DC Pisapui Hall-ah lawm a ni. He hunah hian Ministry of DoNER hnuaiah Thenzawl chu Global Model Site atan thlan a nih thu tarlan a ni.

Tour Itinerary Creation Competition vawi khatna hi November 5, 2024 zan khan Ignite Studio, Aizawlah buatsaih a ni a; district tin aṭanga tel zingah Serchhip district chu pakhatna niin, lawmmanah Rs 30,000 an dawng.

Intihsiaka pakhatna nih lawmnaah hian Tourism deputy director Dr R Lalrinchhani chuan thu sawiin, "Sorkar laipuia DoNER hnuaiah Global Model Site atan Thenzawl thlan a ni," a ti a; Serchhip district-in tourism hmasawnna atan hmunhma a neih ṭhat thu a sawi.

Khuallian Paul L Khuma a, Serchhip bawrhsap chuan, "Khuanu min duansak sa hmun mawi tak tak kan neihte hi kan tihlar thiam a, khualzin lo kal apiangte kan dawnsawn ṭhat a, lo kal nawn an chakna tura kan duat thiam a pawimawh," a ti.

Tourism industry chu khawvela industry ṭhang chak palina a nih thu sawiin Bawrhsap chuan, "Sum tam tak thawhchhuah theihna remchang a nih avangin keini Serchhip district mipui pawhin tourism sector-ah chak taka hma kan sawn theihna turin hmathlir thui tak a nei," a ti a; khualzinte buaipui danah leh social media hman ṭangkaiah inzir zel a ṭul thu a sawi.