Tar, hmeithai leh rualbanlo pension tihpun vangin ZPM Ṭhalai an lawm

ZPM Ṭhalai chuan thuchhuah siamin, chief minister Lalduhoma leh a kaihhruai ZPM sorkarna hnuaiah tar pension, hmeithai leh rualbanlote'n hamṭhatna ṭha zawk an hmuh avangin lawmawm an tih thu an tarlang.

ZPM ṭhalaite chuan, "DSWO, Aizawl West hnuaia tar pension, hmeithai leh rualbanlo pension la, MRB-a account nei zawng zawngte, an puala hamṭhatna awmte chu CM Pu Lalduhoma leh a kaihhruai mipui sorkarna hnuaiah November 8, 2024 tlai dar 3 khan bank-ah sem tura dah a ni ta. SBI-a account neite pawh vawiin (11.11.2024) hian bank-ah dah tura ruahmanna siam a ni a, tunkar tawpah emaw, kar tharah emaw an account-ah lut tura beisei a ni," an ti.

ZPM Ṭhalai tarlan danin, tar pension, hmeithai pension leh rualbanlo pension atan Mizoram sorkarin state share April-September, 2024 atan a pe a; mi pakhat tan thla khat atan Rs 1,000 zel pek niin, thla ruk (April-September) chhung atan Rs 6,000 zel pek a ni.

Hmeithai, rualbanlo leh tar chak lo zawkte tan hamṭhatna tihsan a ni ta chu lawmawm an tih thu tarlangin ZPM Ṭhalai chuan, "Thu mai ni lo, a taka thawk ṭhin CM Pu Lalduhoma leh a kaihhruai ZPM, mipui sorkar kan nei hi ram mipui tan a thlamuanthlak tak zet. Mipui sorkarna hnuaiah rethei pachhia, hmeithai, rualbanlo leh tar chak lo zawkte hlamchhiah an ni ta lo hi lawmawm kan ti tak zet a ni," an ti.