Lawngtlai district-a ráltlânte hnenah sorkarin buhfai qtl. 1,520.22 sem dawn

Lawngtlai district-a Myanmar, Bangladesh leh Manipur aṭanga ráltlân mi 8,020-te tan sorkar laipui leh Mizoram sorkar chuan buhfai quintal 1,520.22 an sem dawn a, nimin khan Lawngtlai DC Cheemala Siva Gopal Reddy chuan Lawngtlai Chandmary-a Kanaan Refugee Camp-ah buhfai sem tur a hlan.

Sorkar thuchhuah tarlan danin, Lawngtlai district-ah hian Myanmar, Bangladesh leh Manipur aṭangin ráltlân mi 8,020 an awm mek a, a tam ber chu Lawngtlai khawpui chhungah an awm.

Ráltlânte tan hian sorkar laipui leh Mizoram sorkar chuan buhfai qtl 1,520.22 sem turin a ruahman a, a vaiin Rs 1,500,000 man sem tur a ni. A hma thei ang bera refugee camp zawng zawngah hlan turin ruahmanna siam a ni tawh.

Lawngtlai DC chuan, sorkar laipui leh Mizoram sorkarin raltlante dinhmun leh harsatna hriain theihtawp an chhuah ṭhin thu sawiin, "Ei leh barah an harsatna phuhrûkna pakhat atan Lawngtlai district-a raltlan awm zawng zawng hnenah buhfai pek a ni dawn," a ti a; thuawih taka awm tur leh sorkar hriatpuina tel loa an awm hmun sawn lo turin raltlante a chah.

Raltlan naupangte tan zirna ngaih pawimawh a nih thu sawiin Cheemala Siva Gopal Reddy chuan, "Ziak leh chhiar thiam tura zirna kalpui kawngah theihtawp chhuah ula, in chenna in leh a chhehvel ṭha takin vawng fai ang che u," a ti.

Lawngtlai DC chuan, Lawngtlai district chu international border-a awm a nih angin ruihhlo tawlhruk lakah fimkhur a ṭul thu a sawi a, "Raltlante ruihhlo zawrh leh tawlhruk emaw, danin a phal loh thila inhnamhnawih lo ang che u. Raltlan in nih angin tualchhung mite nen inngeih taka chengho turin ṭan la ula, harsatna in neihah nangmahni ṭanpui turin sorkar a awm reng a ni," a ti.

Kanaan Refugee Camp-a buhfai hlanna inkhawm hi Lawngtlai additional DC Zoramsiama Hmar-in a kaihruai a, sorkar hotute bakah Lawngtlai Chandmary Village Council member-te an tel a ni.