Mizoram Polytechnic harsatna chingfel thuai turin sorkar ngen

Lunglei District Youth Congress Committee (LDYCC) chuan, court-in Mizoram Polytechnic, Lunglei building-te kalh tura hriattirna a chhuah vanga zirlaite leh thawktute'n harsatna an tawh chu chingfel thuai turin Mizoram sorkar an ngen.

LDYCC hruaitute chuan Mizoram Polytechnic hi nimin khan an tlawh a; an president Moses Lalrinchhana Chinzah chuan, "Mizoram Polytechnic hi Mizoram pumin kan inṭâwm a nih bakah, state dang aṭangte pawhin zirlaite'n an pan khawm ber a ni. Zirna-in pawimawh tak mai tihṭhuanawpa a awm tur leh zirlaite'n an tuar tur hi Mizoram sorkar hian a rang thei ang berin ngaihven se, an harsatna tawh mek hi chinfelsak thuai turin sorkar kan ngen a ni," a ti.

Thu dawn danin, Mizoram Polytechnic ram luah man hi ram neitu Vanlaldawngliana s/o H Sporta (L) Theiriat, Lunglei hnenah pek a nih loh avangin court-in tun hnai khan November 12, 2024 ral hmaa Mizoram Polytechnic building-te kalhsak turin Lunglei Police Station officer in-charge (OC) a hriattir a ni.

Mizoram Polytechnic zirlaite'n November 13, 2024 aṭangin exam an ṭan dawn a; an building kalh a nih dawn si avangin Mizoram Polytechnic main building aṭangin multipurpose hall-ah nimin khan an insawn a ni.

LDYCC chuan, Mizoram Polytechnic-ah hian zirlai 214 an awm a, anni bakah hian back paper nei mi eng emaw zat an awm bawk tih an tarlang.