Ruihhlo dona atan Rs 2,00,00,000 sem

Working Committee on Ruihhlo Do kaltlangin nimin khan Excise & Narcotics department (END) conference hall-ah ruihhlo donaa hmalakna atan pawl hrang hrang hnenah Rs 2,00,00,000 (nuai 200) sem a ni a, END minister Lalnghinglova Hmar-in a hlan.

Lalnghinglova Hmar chuan, tlawmngai pawl hrang hrangte leh sorkar inkarah thawhhona ṭha tak a awm chu lawmawm a tih thu leh chhunzawm zel tlak a nih thu a sawi a, "Sorkar, tlawmngai pawlte leh kohhrante tun aia nasaa kan ṭan rual theih phawt chuan Mizorama ruihhlo hluar lutuk hi tihtlem theih a niin ka hria," a ti.

END Minister chuan, "Ruihhlo dona thâ tichak turin sorkarin END tan lirthei ke pali nei 14 leh ke hnih nei pali min pe," a ti a; district thar pathumah a rang lamin Excise office hawn a nih dawn thu leh thawktu tur a theih ang anga lak belh a nih dawn thu a sawi.

Sum inhlanna inkhawm hi END commissioner Z Lalhmangaiha, Working Committee on Ruihhlo Do member secretary ni bawkin a kaihruai a; Central YMA, Mara Thytlia Py (MTP) leh Central Young Lai Association (CYLA) hruaitute'n an hmalaknate an tarlang bawk.