KHAWTHLIR
SRH-ah mi 21 awm
State Referral Hospital-ah nimin khan Covid-19 vei mi pathum dah luh an ni a, anni nen Covid-19 vei mi 21 an awm mek. SRH-ZMC Bulletin tarlan danin, mi 21-te chu Isolation ward-ah an awm vek a, ICU-a enkawl ngai awm rih lo mah se, mi paruk chu oxygen pek mek an ni.
Sample endik lo
ZMC Covid-19 Laboratory chu nimin khan tihfai (cleaning & fumigation) a ni a, hei vang hian swab sample endik a awm lo. Vawiinah sample test chhunzawm a ni ang.
World Soil Day
Krishi Vigyan Kendra (KVK), Kolasib chuan Inrinni khan an training hall-ah World Soil Day an hmang. He ni pual hian Buhchangphai leh Lungdai khuaa loneitu mi 105 hnenah Soil Health Card an sem a, loneitute hnenah thil pawimawh chi hrang hrang an zirtir bawk.
Thisen Pe
December 5, Inrinni khan Adventist Youth Federation, Aizawl chuan Civil Hospital, Aizawlah thisen unit 87 an pe a, petute mipa 64 leh hmeichhia 23 an ni. ṬKP, Bawngkawn Unit pawhin pein, mipa 11 leh hmeichhia pahnihin unit 12 an pe a; mimala pe (individual donor) mi 22 an awm bawk. KṬP, Zemabawk Branch chuan Synod Hospital tan thisen unit 33 an pe a, petute mipa 30 leh hmeichhia pathum an ni. Lunglei Pukpui bial PYD (NEI)-in Civil Hospital, Lunglei tan unit 51 an pe bawk.
Sialsuk tlang leh Sakawrhmuituaia lèn phal lo
Sialsul Village Task Force (VTF) chuan thuchhuah siamin, Sialsûk tlanga lên tum mikhual an tam ṭhin tih an tarlang a, "Hri léng vangin Sialsûk tlángah lèn phal a ni lo tih Mizoram mipui kan hriattir nawn leh a ni. Uluk taka duty a ni a, tlanga lèn tumte chu hnar haw zel a ni tawh ang," an ti. Sihphir VTF pawhin an khawtlang dinhmun thlirin, Sakawrhmuituai tlang leh a chhehvelah kal, lên leh zana riahte an khap. Reitlang leh Hmuifangte pawh hri leng avanga tlawh phal a ni lo.