Zairawna Mizo nu hâl hlum chungchangah zangnadawmna pe turin Manipur CM phût

Mizoram Pradesh Youth Congress Committee (MPYCC) chuan Zairawn khua, Jiribam district, Manipur-a Zosangkim Hmar (31) w/o Ngurthansang Hmar hâl hlum a nih chungchangah nimin khan Mizoram Governor kaltlangin Manipur Chief Minister hnenah lehkha an thawn a, zangnadawmna pe turin an phût.

Thu dawn danin, November 7, 2024 zan dar 9 vel khan Zosangkim Hmar chu mi firfiakte'n an pawngsual bakah an hâl hlum zui a; a chhungte hnenah zangnadawmna pe tura phûtna lehkha Manipur chief minister N Biren Singh hnenah Governor kaltlangin MPYCC chuan an pe a ni.

MPYCC hian an lehkha copy chu Union Home minister Amit Shah leh Mizoram chief minister Lalduhoma hnenah an thawk bawk.

MPYCC president Laltawnliana chuan, Manipur Chief Minister-in na tak tak leh ṭawngkam mawi lo tak takin Mizoram CM a cho thu national media-ah hmuh tur a tam nia sawiin, "Hei hian Mizoram mipui nasa takin a tichiai. Heti taka khawvel pum hmuha Mizoram mipuiin an thlan kan CM a chona hi Congress ṭhalai chuan a ngaizam mai mai dawn lo a, na taka Manipur CM hi do lêt turin Mizoram sorkar leh mipui ka sáwm a ni," a ti.

Congress ṭhalai President chuan, Home minister K Sapdanga'n ZPM working president a nih laia November 2, 2023-a Aizawl Press Club-ah thuthar thehdarhtute a kawm ṭumin, 'BJP Meitei ho sapatâl vanga kan unaute tawrhna chu Mizoramah ZPM sorkar a din hnu pawha NEDA hoin kan unaute an la sawisa chhunzawm zel a nih chuan, ralkhat aṭanga kut kuangkuaha thlir ngawt kan tlin ve pek lo ang, a hen tâwk tala kan unaute thlavâng kan hauh ve pawhin min dem bik lo turah kan ngai,' tiin a sawi tih a sawi a; tuna Home Minister ni tain thu a lo sawi tawh chu Mizoram mipui leh Manipur-a an unaute'n a taka hmuh an duh tawh niin a sawi bawk.