Mizoramah sample endik aṭanga Hripui vei hmuh chhuah zat 2.56%
Mizoram aṭangin Covid-19 vei leh vei loh hriat nan swab sample 1,49,379 endik a ni tawh a, chu'ng aṭang chuan hripui vei mi 3,825 hmuh chhuah a ni. Sample endik zat aṭanga hripui vei hmuh zat hi 2.56% a tling.
Health department hnuaia IDSP chhinchhiah danin, Mizoramah swab sample endik theih a nih hmain Mizoram páwnah - Kolkata, Guwahati leh Silchar-ahte mi 58-te sample endik hman a ni a, chuta ṭang chuan hripui vei pakhat, Guwahati Medical College-ah March 24 khan hmuh chhuah a ni.
April 7, 2020 aṭangin Zoram Medical College (ZMC)-ah RT-PCR hmangin swab sample endik ṭan a ni. Endik ṭan aṭanga November 29, Pathianni thleng khan sample 80,424 endik tawh niin, chu'ng aṭang chuan Covid-19 positive mi 2,445 a ni a, chu chu 3.04% a tling.
TrueNAT-PCR hmanga sample 10,804 endik tawh aṭangin Covid-19 vei mi 536 (4.96%) hmuh a ni a; Rapid Antigen Test (RAT) hmanga sample 58,093 endik aṭangin hripui vei mi 843 (1.45%) hmuh chhuah a ni bawk.
Mizorama Covid-19 positive hmuh chhuah tawh mi 3,825 zinga mi 1,788 chu Mizoram chhunga kái an ni a, mi 2,037 chu state páwn aṭanga rawn lût an ni thung. Hetih lai hian, Mizoram luhka hrang hranga screening point-ah nimin tlai dar 4 thleng khan rapid antibody test hmangin mi 1,98,315 enfiah tawh a ni.