Chief Secretary-in office hun vawng dik turin sorkar hnathawkte a chah

18th May, 2015

Chief secretary Lalmalsawma chuan, sorkar hnathawkte zawng zawngin pisa kai hun chungchangah ṭan an lak thar a ngaih thu a sawi a; sorkar hnathawkte chu hna thawh hun chhung (office hour) dik taka vawng turin a chah.

Vanglaini palaiin a kawmnaah Chief Secretary chuan, tun hma aiin tun dinhmunah sorkar hnathawkte'n pisa kai hun an vawng dik tawh zawka a hriat thu a sawi a, "Office hun dik taka vawng turin kan inhrilh ve reng a, secretary-te meeting-ah kan sawiho ṭhin. Secretary-te chu an department chan ṭheuhah pisa hun vawng diktir turin kan chah a, secretary-te'n department director-teah an hrilh chhawng leh ṭhin a ni," a ti.

Sorkar hnathawkte pisa ṭan huna office an thlen leh thlen loh endikna (surprise checking) chungchang pawh tun hnaia secretary-te meeting-ah sawi chhuah a nih thu sawiin, Lalmalsawma chuan, ṭan lak thar ni se an tih thu leh, General Administration Department (GAD) bawhzui tura an dah thu a sawi.

Chief Secretary sawi danin, Central 5th. Pay chu hlawh tihpunna ringawt a ni lo a, office hour chu ni khatah darkar 8 a ni ngei tur a ni, tih a ni a; mahse hei hi Mizoramah chuan zawm a ni ve lo.

Lalmalsawma chuan, Central sorkar hnuaia ni khata hna thawh hun chu darkar 8 a tling ngei tur a ni tih sawiin, "Thlasik leh nipuiah a danglam lo a, pisa ṭan hun leh bân hun pawh a danglam lo," a ti a; chutiangah chuan ṭan hun leh bân hun mila inhmakhua a ngaih ṭhin thu a sawi.

Lalmalsawma chuan, "Sorkar hnathawk zawng zawngte'n neitu rilru kan put a ngai a, sorkar neitu vek kan ni.n Kan zavai hian sorkar kan ni vek a, inhlawhfa rilru put loh a ngai," a ti.

Chief Secretary chuan, pisa hun vawn dik kawngah sorkar hnathawk zawng zawngte an ṭan thar a ngaih thu a sawi a; sorkar hnathawk zawng zawngte chu pisa kai hun vawng dik a, pisa ṭan huna thleng ngei tur leh bàn hun hmaa haw lo turin a a chah a ni.

Chief Secretary Lalmalsawma hian a official car-ah 'Chief Secretary' tih a vuah lo a; hemi chungchanga zawhna chhangin, Lalmalsawma chuan, "State dangah pawh chief secretary-te'n an vuah ngai lo zawk a ni," a ti.