Scho. tur vbc. 15.53 dawng

2014-15 chhunga pawl 10 hnuai lam tana Pre Matric Minority Scholarship la dawng ve lote chan tur Mizoram Scholarship Board (MSB)-in a dil belh Rs. 15,53,32,970 chu sorkar laipuiin a rawn pe tawh. MSB hotute chuan, scholarship hi tun karah sem theih an rin thu Vanglaini an hrilh.

MSB hotute sawi danin, pawl 1 aṭanga pawl 10 thleng zirlaite tana Pre Matric Minority Scholarship tur chu nikum khan Ministry of Minority chuan Mizorama zirlai, sakhaw hrang hrang hrang awmte tan a rawn pe a, an pek zat tur erawh hriat lâwk theih a ni lo.

Nikuma sum an rawn pek chu Kristian zirlai 10,000-te leh Muslim zirlai 156-te chan tur a ni a; a tira pawisa an rawn pek chu zirlaite'n an inchan loh ṭhin avangin dil belh leh tura an tih angin MSB hotute chuan an dil belh leh a ni.

MSB-in scholarship sum an dil belh (additional scholarship) chu March 25, 2015 khan Central-in phalna a rawn pe a; MSB chuan Mizoram sorkara Finance department-ah dil nghalin tun karah chuan an sem hman an inbeisei thu MSB hotute chuan an sawi.

Pre Matric Minority Scholarship hi pawl 1-5 inkar tan Rs. 1,000-a sem a ni a, pawl 6-10 tan Rs. 5,000-a sem a ni.

Tuna pawisa sem chhuah tura an dawn chu Rs. 15,53,32,970 a ni a; Kristian zirlai 60,522 leh Bhuddist zirlai 2,123-te, an vaiin zirlai 62,645 dawn tur a ni. Minority Scholarship hi Central-in a tum vek a, Mizoram sorkarin tum ve tur a nei lo.