KHAWTHLIR

Thisen pe
Leitan Bial KṬP-te chuan Inrinni khan Leitan Kohhran hall-ah blood donation camp an huaihawt a; Synod Hospital tan thisen unit 63 an pe a, a petute mipa 55 leh hmeichhia pariat an ni.

Kawng dan tum
Lungleia Sikul Ṭan Hma Duhlo Pawl invuahte chuan zing dar 8-a sikul ṭan an duh lohna lantir nan naktuk, Thawhlehni zing aṭangin Lunglei pawhtu kawngpuite dan an tum.

Pavalai Meet tiak
Presbyterian Kohhran Pavalai Pawl Meet vawi 2-na, Khatla Kohhran biak-ina May 15 zana ṭan chu nizan khan a ṭiak. Pavalai Meet-ah hian Mizoram hmun hrang hrang aṭangin palai 7,000 vel an kal khawm.

BCM Kristian chhungkaw ni
Baptist Church of Mizoram (BCM)-te chuan nimin khan ‘Kristian chhungkaw ni’ an hmang a, tualchhung kohhran tinah hun hman niin, thupui chu ‘Kristian chhungkua leh sum remchem leh khawl‘ tih a ni.

Catholic hmeichhe Rorel Inkhawm
Mizoram pum huap Catholic Hmeichhe Pawl chuan Inrinni khan St. Thomas Hall, Ramhlun North-ah rorel inkhawm an nei. An thurel zingah India rama Catholic biak-in tihchhiat leh kohhran serh leh sâng zah loh taka sawisak, Kolkata-a sister pawngsual duh loh lantir nana ram puma chaw ngheia ṭawngtai neih hun turte a tel.

Missionary Retreat
Synod Mission Board chuan May 14 zan aṭangin Armed Veng Kohhran biak-inah India hmarchhak biala missionary-te pualin 'Missionary Retreat' an buatsaih a, nizan khan a ṭiak. Missionary Retreat-ah hian thupui chu ‘Ram lak tur a la tam hle si a’ tih a ni a, speaker chu Rev Dr Lalchungnunga a ni.

Financial literacy
Reserve Bank of India, Guwahati chuan Inrinni khan Central YLA Hall, Lawngtlaiah Financial Literacy Camp an buatsaih. Campaign-ah hian CYLA bakah, MHIP, Lai Women Association leh self help group 32 an tel a, RBI chuan pawl tinte chu thilpek an hlan vek a ni.