Aizawl Civil Hospital endiknaah thil fel lo hmu

Assembly Subject Committee-III member-te'n Health department hmunhmate leh bungruate an enfiahnaah Aizawl Civil Hospital -a computer thlun zawm danah thil dik lo an hmu.

Assembly Subject Committee-III chairman Lalrobiaka leh member-te JH Roṭhuama, John Siamkunga, Dr K Beichhua leh Lalrinawma-te chuan May 15, 2015 khan Aizawl Civil Hospital leh Zemabawka Mizoram State Cancer Institute an endik a ni.

Thu dawn danin, Assembly Subject Committee-III hian Aizawl Civil Hospital computerised a nih danah thil dik lo leh famkim lo deuh an hmu a ni. ACH computerisation-ah sorkarin 100% zo tawh angin sawi mah se, cheng nuai 400 chuang sênna hna thawk turin tender chhuah a ni lo a; internet pawh ward tinah thlun vek tura tih a nih laiin, sorkarin a man a pe tawh chungin, internet a la awm lo.

Assembly Subject Committee III hian ACH-a CT Scan khawl te, Cardiology department-a khawl thar leite leh cancer damdawi-ina khawl lei tharte pawh an endik a; khawl lei tharte chu ṭha an tih thu an sawi.

Assembly Subject Committee III member-te hi Health department hotute'n an ṭawiawm a, an thil hmuhte chu an sawiho leh dawn a; sorkarah report an thehlut dawn a ni.