Mizoram sum harsatna sukiang turin MP Sapa'n Finance Minister a ngen

Rajya Sabha MP Ronald Sapa Tlau chuan tun hnaia Parliament budget session neih zawh tâkah thu a sawi a; Finance minister Arun Jaitley chu Mizoram sorkarin sum leh paia harsatna a tawh mekah chhanchhuak turin a ngen.

Ronald Sapa chuan, sorkar laipui chu Mizoram hnena additional fund pe turin a dil a, "Ṭum khat kan sum harsatna lak aṭanga min chhan chhuak a nih chuan, additional fund beisei tawh loin kan kal thei tawh ngei ang tih ka chiang. A chhan chu tunah hian kan sorkar hian sum hmanna tihtlem lamah theihtawp a chhuah a, chhiah hrang hrang tihpun a tum mek a ni," a ti.

Ronald Sapa chuan Planning Commission hun laiin hmarchhak state-te chuan plan fund-ah 10% tumin, a bak 90% chu sorkar laipuiin an tum ṭhin thu sawiin, "Hetiang a nih lai hian CSS tam tak chu chhunzawm a ni lo," a ti a; sorkar laipui kalphung thar ang chuan hmarchhak state-te'n sum leh paiah harsatna an tawh tur thu a sawi.

Mizoram chu tlang ram a nih avangin inkal­pawhnaah harsatna tam tak a awm thu sawiin, Rajya Sabha MP chuan, "Thil phurh man a to bakah, kalkawnga thang chhung a rei bik a. Heng harsatna laka kan fihlim theihna atana special finance package min pek theih chuan a lawmawm ngawt ang," a ti.

Ronald Sapa Tlau chuan, India ram kum 68-a independent hnuah pawh Mizoram chu rélin a tlawh mumal loh thu sawiin, "Rel hian ramri chiah a tlawh a ni. Tunah chuan khawpui tlawh turin hna muang taka thawh a ni," a ti a; Railways Minister chu chak zawka hna thawh a nih theihna atana theihtawp chhuah turin a ngen a ni.

Ronald Sapa Tlau chuan thla 9 chhungin Mizoram chu governor pasarih pek kan nih thu sawiin, "Ka member puite hian awih harsa in ti mai thei, Mizo mipuite pawhin awih harsa kan ti hle. Governor hi dinhmun zahawm tak a nih laiin, tunah chuan Mizo mipuite hian governor hi engtianga ngaih tur nge pawh an hre tawh lo," a ti.