MJA-te'n Bukvanneia Oil Palm Mill an tlawh

MJA General Conference neih zawh taka palai kalte chuan, Bûkvannei khuaa Godrej Agrovet Ltd. enkawl Oil Palm Mill an tlawh a, hnathawktute'n an hnathawh dan leh an harsatna tawhte an lo hrilh.

Kolasib leh Mamit district-a oil palm thar chhuah leitu Godrej Agrovet hotute chuan an harsatna tawh lian ber chu kawng ṭha lo a nih thu an sawi a, "Kawng a ṭhat tawk loh avangin loneitu tam takin an oil palm thar chhuahte an rawn hralh thei lo a, kan duh ang zat lei tur kan hmu zo lo. Kawng hi ṭha se chuan tun aia tam daih hi lei tur a awm theih kan ring," an ti.

Godrej Agrovet hotute sawi danin, Bukvanneiah hian oil palm chu a hriak an la chhuak ringawt a, sawngbawl turin Kolkata-ah an thawn ṭhin. Oil palm lei tur duhkhawp an hmuh theih chuan a sawngbawlna factory pawh Bukvanneiah an din ngam dawn a ni.

Oil palm tam zawk an lei theih nan kawng siamna tur sum an ruahman loh chhan zawhna chhangin Godrej hotute chuan, "Khawl bunna atan cheng vaibelchhe tam tak kan seng tawh a, tunah hian kan la chawi belh a ni. Chuvangin, tun dinhmunah chuan kawng siamna atan pawisa invest ngam chi a ni hrih lo," an ti.

Oil Palm Mill hi October 2014 khan hawn a ni a, March 2015 thleng khan oil palm matric ton 2909.39 an lei tawh. Oil palm hi kg. khat Rs. 5.30-in an lei a ni.

MJA member-te hian Vairengtea Counter Insurgency & Jungle Warfare (CIJW) pawh an tlawh a, an hmun ṭhenkhat fanpui an ni.