Zu zawrh hnuah khehpuam la man lo

Excise & Narcotics department (END)-a enforcement-te chuan March 16, 2015-a zu zawrh ṭan hnuah khehpuam an tih mai, Pseudoephedrine an la man lo a; January 16 - March 15, 2015 chhungin khehpuam mûm 4,22,890 an man thung.

Zawhna chhangin Excise & Narcotics dept. hotute chuan March 16, 2015-a Mizo­rama zu zawrh hnu leh zu zawrh hma thla hnih chhunga END-in ruihhlo an man leh ruihhlo kaihhnawiha mi an man zat chu a inthlau vak lo a, mahse Pseudoephedrine bik erawh chu zu zawrh hnuah an la man lo tih an sawi.

Excise & Narcotics dept. hotute, "END-a thawktu awm sate hi zu permit pek chhuahna leh zu zawrh vanga ṭul pawimawhah an chêt reng a ngaih avangin kan indaih lo zual a, damdawi kan man tlem chhanah hian nghawng a nei ve deuh ang," an ti.

Mizorama zu zawrh ṭan ni, March 16 hma lam thla hnih chhung January 16 aṭanga March 15 inkara END-in ruihhlo chi hrang hrang an mante chu zu zawrh hnu March 17 leh May 13 inkara an mante aiin a tlem deuh vek a ni.