Bru chhungkaw 281 ṭanpuina pe

Mizoram aṭanga Bru raltlan, Tripura transit camp-a awmte zinga anmahni duh thua Mizorama let chhungkaw 281-te hnenah chhawmdawlna sum sem mek a ni.

Thu dawn danin, June 2014 hnu lama mahni duh thua Mizorama Bru lo kîrte chu Mizoram sorkar official-te'n an enfiah hnuah, India khua leh tui dik takte hnenah chhawmdawlna sum pek chhuah a ni a; Mamit DC office kaltlanga ṭanpuina sem chhuah tur chu a vaiin Rs. 2,45,87,800 a ni.

Bru lo lette chu an chen lailâwkna (temporary shelter) atan Rs. 2,000, an rawn letnaa motor an hman man atan Rs. 5,500, in sakna (housing assistance) atan Rs. 38,500, leh tangkafaia ṭanpuina (cash assistance) Rs. 41,500 pek an ni a, sum fai pek zat hi a vaiin chhungkaw pakhat tan Rs. 87,500 a ni.

Chhawmdawlna pek tur Bru chhungkuate chu EPIC leh Tripura-a an ration card hmanga endik an ni a, kar khat hnuah kum khat chhung buhfai a thawna an dawnna tur free ration card pek an ni ang.

Tun tuma chhawmdawlna pawisa dawngtute hi Mamit district-a chhungkaw 249 leh Kolasib district-a chhungkaw 32 an ni a; Mamit DC Office-a Bru Cell-in an chhinchhiah danin, Ministry of Home Affairs duh dan anga Mizoram sorkarin Bru hruai kir hna a thawh hnua mahni duh thua Mizorama let tawh, Mamit district-a awm zat chu chhungkaw 827 an ni.