CM-in Kolkata Mizoram House thar a hawng

Kolkata-a Mizoram House thar, Rajarhat (New Town)-a mi chu May 15, 2015 tlai khan chief minister Lal Thanhawla'n a hawng. Mizoram House thar hi cancer veite thlenna tur bik deuha sak a ni a, Tata Cancer Hospital bula awm a ni.

Chief Minister chuan, Mumbai-ah pawh Tata Memorial Hospital bulah Mizo cancer veite tan Mizoram House sak a nih thu sawiin, "Damlote tan chauh a ni tih hriain, officer zin veivâkte'n thlen an tum tur a ni lo," a ti.

India ram khawpui hrang hrangah Mizoram House sak belh zel tumin sorkarin ṭan a lak thu sawiin, Bangalore-ah Mizoram House sakna tur hmun hmuh a ni tawh tih a sawi a; Chennai-ah pawh Mizoram House sakna tur hmun zawn mek a ni tih a sawi.

Sikul ṭan hma sawiin, Lal Thanhawla chuan, zing dar 8-a sikul ṭan dodal an awm chu hnam dangin an hriat chuan Mizo tan a hmingchhiatthlak hle dawn niin a sawi. Zu zawrh chungchangah, thil awm dan enchhinna a ni a, a ṭhat chuan chhunzawm zel a ni ang a, a ṭhat loh erawh chuan tihtawp a ni mai dawn tih a sawi bawk.

Mizoram PWD chief engineer (Buildings) Lalmuankima Henry sawi danin, Kolkata-a Mizoram House pathumna hi Rs. 21,43,00,000 sêngin M/s Gagan Construction Pvt. Ltd.-in June 2011-ah an sa ṭan a, June 2014-ah sak zawh a ni. In hi chhawng ruk a ni a, a zau zawng chu square meter 1974.39 a ni.

Mizoram House tharah hian pindan tinah air conditioned dah vek a nih bakah, CCTV 27 dah a ni a; dormitory pahnih, leh pindan pangngai 13 a awm a, khum awm zawng zawng chu 88 a ni.