COVID-19: Mizoram dinhmun Niminah mi 59 chhuahtir an ni

November 29, Pathianni khan Mizoramah swab sample 318 endik aṭangin Covid-19 vei mi pathum hmuh chhuah a ni. Nimin khan hripui laka fihlim tawh mi 59 chhuahtir an ni thung.

Mizoramah Covid-19 positive mi 3,825 hmuh chhuah a ni tawh a, mipa 2,822 leh hmeichhia 1,003 an ni. Nimin tlai dar 5 thleng khan mi 3,499 (91.48%) chhuahtir an ni tawh a, mi panga (0.13%) thi tawhin, enkawl mek mi 321 (8.39%) an awm.

Covid-19 vei Pathiannia hmuh chhuah thar pathumte chu mipa vek niin, Rapid Antigen Test (RAT) hmangin Aizawla hmuh chhuah an ni a; RAT hmang hian district parukah sample 209 endik a ni. TrueNAT-PCR hmangin district paliah mi 109-te swab sample endik ni mah se, hripui vei hmuh a ni lo a; ZMC laboratory erawh chu khâr a nih avangin sample test a awm lo.

Hripui vei hmuh tharte chu kum 18, 23 leh 46 mite an ni a, Vaivakawna pafaza an ni. Pa ber hi a dam loh avangin damdawi-in pakhatah inentir turin a kal a, RAT hmanga endiknaah Covid-19 pisitive a ni tih hmuh a ni. A chhungte pawh endik ve nghal an ni a, a fapate pahnih pawhin hripui an vei tih hmuh a ni. Hri an kài ṭanna àwm hriat a ni lo a, symptom nei vek an ni.

Nimin khan Covid-19 laka fihlîm tawh mi 59 chhuahtir an ni a; SRH-ZMC aṭangin mi panga, Durtlang BSUP, Lunglei leh Mamit aṭangin mi pahnih ṭheuh, Serchhip aṭangin mi 29, Lawngtlai aṭangin 12,

Khawzawl aṭangin pali, Kolasib aṭangin pakhat leh home isolation-a awm mi pahnih an ni.

IPR department thuchhuah chuan, "CMO, Champhai aṭanga thu dawn danin, 19.11.2020 khan Champhai district-ah Covid19 +ve hmuh chhuah thar mi 6 chu report-naah hmuh chhuah thar pakhat aia CCC awm lai repeat test +ve hming report palh a ni a. Hemi kal zelah hian report dik lo palh hriat chhuah niin, vawiin hian tihdikna siam a ni," a ti.