Mimal inhuatna avanga Speaker hmalakna a pawi kan ti tak zet - ZLP

ZPM Legislature Party (ZLP) chuan thuchhuah siamin, ZLP leader Lalduhoma, Assembly speaker Lalrinliana Sailo-in anti-defection dan hmanga MLA aṭanga November 28, 2020-a a bàn (disqualify) chu pawi an tih tak zet thu an tarlang. Mimal inhuatna vanga hmalakna nia sawiin, pawi an tih thu an sawi bawk.

ZLP thuchhuah chuan, "Assembly session-ah mipui tana thu dik hriattir leh sorkar khalh ngìlna atana hma la ṭhintu chu anti-defection dan siam a nih chhan, mahni vote-tute phatsan vanga hremna Pu Lalduhoma chunga lek a ni ta zawk hlauh hian Mizoram mipui leh a thlang tlingtute rilru a tina tak zet a, ZLP member-te pawh min tihrilhhai hle a ni," a ti a; mahni thlang tlingtute bula awm a, an tana hma late chu anti-defection danin paih bo a tum phatsantu (defector) an ni thei lo tih a tarlang.

MNF chu kum 1987-a independent MLA ni chunga MNF party hruaitu nihna chelhtu leh party dang aṭanga MLA uiréte lo hum tawhtute an nih thu sawiin ZLP chuan, "Hripuiin min nuai lai leh ramrîah buaina kan tawh mek laia party inrâwn tawn leh ṭang ruala hma la tura kan beiseite'n rorelna in sang ber tihnawk a, mipui tichî-âi zawnga hma an la hi kan dem tak zet a ni," an ti.

ZLP chuan, "Ram rorelnaah opposition chak a pawimawh tehlul nen, kan Speaker leh MLA 12-te hmatheha mimal inhuatna avanga hmalakna hi pawi kan ti a, a Kristian zia lo hle. Mizoram chanchin ziakah ser lianpui a awm tawh tur hi pawi kan ti hle a ni," an ti a; Mizoram tana thil lungchhiatthlak tak thlentirtute chu ṭawngṭaisak turin mipui an ngen.

Zoramthanga kaihhruai sorkar chu an hnathawhnaah dan ngai pawimawh tur leh mipui hlâwkpui theih tur thil buaipui tawh tura an ngen thu sawiin ZLP chuan, "Pu Lalduhoma kaihhruaina hnuaia huaisen taka Zoram mipui tana thu dik hâi langa hma kan lo lâk tawhnate keini ZLP member-te chuan Assembly ṭhutkhawmah kan chhunzawm zel dawn. Pu Lalduhoma hi kan hruaitu a la ni reng a, a thuràwn kan la la reng a, Mizoram Assembly-ah a kaihhruaina hnuaiah chak zawkin hma kan la zel dawn a ni," an ti.

ZLP member-te chuan Kristiante tiha mawi, mahni thlang tlingtute hriat zui hi an tih turah an ngaih thu leh Assembly session leh ram kaihhruainaah Mizoram mipui tan nghet leh huai taka an din zel dawn thu an tarlang bawk.