BJP puihna vangin MNF an sorkar - BJP National Spokesperson

BJP national spokesperson (i/c Mizoram) Mmhonlumo Kikon, Nagaland MLA chuan, kum 2018-a Mizoram Assembly inthlanpuiah MNF-te chu BJP puihna avanga sorkar thei an nih thu a sawi.

Mmhonlumo Kikon hian nimin khan Aizawl Press Club-ah thuthar thehdarhtute a kâwm a; MNF chu BJP tan kawppui ṭha tak an nih thu sawiin, "MNF-te nen hian kan thawkho ṭha a, kum 2018 inthlanah pawh BJP puihna avangin sorkarna an chang a ni. Tu pawh zawt ila, 'MNF-te hi BJP puihna avangin sorkar an ni lo,' an ti thei lo ang," a ti.

MNF chu BJP-te'n an ngainat thu sawiin Kikon chuan, "Min ngaina ve lo a nih chuan thu hran. Keini chuan kan thláwp zel ang," a ti a; chief minister Zoramthanga chu hmasawnna duh mi nia an hriat thu a sawi. BJP thupuangtu chuan, Mizoram MP-te chu Parliament-ah ruling ṭhutnaah ṭhuttir an nih thu sawiin, "BJP-in Mizorama MLA kan neih ve chhun pawh ruling lama ṭhuttir ve turin kan duh. A tìr aṭangin ruling lamah ṭhuttir ve turin kan nawr a, mahse, a la hlawhtling thei lo. Kan MLA hi ruling lama a ṭhut theihna atan kan nawr chhunzawm zel ang," a ti.

Mmhonlumo Kikon chuan, LADC-a MDC inthlanah BJP-in sorkarna an siam chuan Union minister Kiren Rijiju thusawi zawng zawngte tihhlawhtlin a nih tur thu a sawi a, "BJP hi national party dang ang kan ni lo, kan thutiamte mipui mamawh angin kan ti hlawhtling ṭhin," tiin, BJP chu party dang anga an intiam satliah ve ngai loh thu a sawi.

BJP Spokesperson chuan, autonomous district council-te'n thuneihna sang zawk an neih theihna atan Constitution siamṭhat tuma hmalak mek a ni tih sawiin, "Tunah hian Parliamentary Standing Committee-te'n an zir chiang mek a, chumi hnuah Parliament-ah put luh a ni ang. Bill pass a nih hunah chuan Finance Commission hnenah ADC-te direct-a fund pek theihna thuneihna a pe dawn a ni," a ti.

Mizoram chu India tan sport power house a nih thu sawiin Kikon chuan, "Sport lama Mizote'n an thawh hlâwk em avangin, lawmthu sawi nan leh Mizoram aṭanga infiammite chawi sáng turin prime minister Pu Modi-a'n project leh programme tam tak a pawmpui a ni," a ti a; Khelo India hnuaiah Kiren Rijiju pawhin Sports Ministry aṭangin project ṭhahnem tak a pawm thu a sawi.