KHAWTHLIR

Republic Veng Branch KṬP chuan nimin khan thisen pek rûnpui an huaihawt a, Synod Hospital tan thisen unit 41 an pe a, petute mipa 36 leh hmeichhia panga an ni.ṭ

Aizawl South-ll bialtu MLA Lalchhuanthanga chuan nimin khan a bial chhunga awm Sikulpui a tlawh a; Sikulpui headmaster Zonunmawia'n lo dawngsawngin, sikul inrêlbàwl dan leh sikulin a mamawhte an sawiho. Lalchhuanthanga chuan, Sikulpui chu a din tirh lamah mission school a ni a, hun rei tak chhung Mizoram sorkarin a enkawl hnua Mizoram Synod kuta hlan lêt a ni chu lawmawm a tih thu a sawi. MLA hi ZPM Ṭhalai president Malsawmzuala leh Mission Veng Local Council hruaitute'n an ṭawiawm a ni.

Tun hnaia LADC MDC inthlan kaihhnawiha Mizorama rawn zin BJP National spokesperson (i/c Mizoram) Mmhonlumo Kikon chuan Governor PS Sreedharan Pillai, chief minister Zoramthanga leh chief secretary Lalnunmawia Chuaungo-te an chenna bangla-ah ṭheuh a kâwm a; thil pawimawh hrang hrang a sawipui a ni.

State Referral Hospital (SRH)-ah nimin khan Covid-19 vei mi pali dah luh an ni a, anni nen SRH-ah hripui vei mi 34 enkawl mek niin, kum 60 chung lam mi panga leh kum 14 hnuai lam pathum an tel. SRH-ZMC Bulletin tarlan danin, Covid-19 vei SRH-a awm mek zinga pakhat chu ICU-ah enkawl niin, oxygen pek mek a ni a; mi dang zawng ward-ah an awm a ni.

Nimin khan ZMC Covid-19 laboratory-ah mi 370 velte swab sample endik a ni. Sample endikte hi November 28-29 chhunga lâkte a ni a, a hma lama sample lâk tawhte chu endik tawh leh result pawh tihchhuah vek tawh a ni.

Association for Volun­tary Blood Donation chuan blood bank-te nen ṭanghoin December thla chhung hian district hrang hranga blood bank-ah Krismas puala thisen pek an huaihawt dawn a, vawiin hian Health & Family Welfare Board vice chairman Dr ZR Thiamsanga, MLA-in a hawng ang.