Mimal inhuatna vangin MLA/MP Bàntir theih an ni lo - MNF party

MNF party chuan thuchhuah siamin, mimal inhuatna vangin MLA leh MP-te bàn theih an ni lo niin an tarlang a; Assembly speaker Lalrinliana Sailo chu dan hmanga dik taka rorel ngam nia ngaiin ropui an tih thu leh, Speaker hnena ngenna/hêkna thehluttu MLA 12-te chu chawimawi phû an tih thu an sawi bawk.

MLA aṭanga Lalduhoma bàn chung­changah, mimal inhuatna thil tih angin dâwt thu tlangaupui mek a nia sawiin MNF chuan, "Anti-defection law Para 2(2) of the Tenth Schedule of Constitution a bawhchhiat avanga hrem a nih thu leh mimal inhuatna avangin MP/MLA tu mah inbàntir theih a ni lo," an ti.

MNF chuan, Lalduhoma chu independent MLA ni chungin Zoram People’s Movement (ZPM) party a zawm niin an sawi a, "Political party a zawm tih hi amah ngeiin a pawm a, ama party din leh a kaihhruai ZNP chu ZPM party-ah an inchhûng lut tih a sawi a ni," an ti. Independent MLA ni chungin Lalduhoma thil tih dan chu ZPM President ai pawhin party activity a ngah zawk nia sawiin MNF chuan, "Hei hian independent MLA nihphung a tlànsan tih a tichiang hle," an ti a; MLA 12-te'n petition an thehluh hnuah Lalduhoma'n High Court-a kal a tum thu a sawi laiin, MLA aṭanga bàn a nih hnuah an party thu anga kal a tum thu a sawi tih an sawi.

MNF chuan, Lalduhoma chu November 24, 1988-ah anti-defection law hmangin India rama Lok Sabha MP bàn hmasak ber a lo ni tawh tih sawiin, "Hei hi anmahni MP hote'n an dan siam ngei a ni. Tunah Mizorama MLA dan bawhchhiat vanga bàntir hmasa ber a lo ni leh ta. MP/MLA aṭangin mimal inhuatna avangin inbàntir theih a ni lo a, dan a bawhchhiat avangin danin a chungah ro a rêl tih kan hriat a ṭul," an ti.

MNF party chuan, "Dan hmanga dik taka rorel ngam Assembly Speaker kan nei hi ropui kan ti tak zet," an ti a; ngenna/hêkna thehluttu MLA 12-te chu Assembly House zahawmna vawnhim duh vang leh hun lo kal leh zel turah ṭhangtharte'n dan an ngaih pawimawhna tura thil ti an nia sawiin, "MNF chuan chhuanawm kan tiin chawimawi phû kan ti hle," an ti bawk.