Sorkarin tuialhtheia cess a lak aṭangin thla khat chhungin Rs 16,48,352 a hmu

Mizoram sorkarin September 1, 2024 aṭanga tuialhthei man a tihsan hnuah October 2024 chhung khan Social Infrastructure & Service cess leh Road Maintenance cess-ah Rs 16,48,352 hmuh a ni.

Taxation-in chhiah an hmuh dan (monthly achievement) aṭanga a lan danin, Mizoram sorkarin petrol leh diesel mana chhiah a tihpun aṭangin October 2024 chhung khan Social Infrastructure & Service cess leh Road maintenance cess-ah Rs 8,24,176 ve ve hmuh a ni a, belhkhawmin Rs 16,48,352 a ni.

Tuialhtheia chhiah (VAT) lak chungchangah hian Taxation department chuan August 30, 2024 khan hriattirna (notification) a tichhuak a; petrol leh diesel-ah hian litre khat zelah Social Infrastructure & Service cess Rs 2 leh Road Maintenance cess Rs 2 lak a ni.

Taxation monthly achievement-in a tarlan danin, sorkar sum kum kal mek 2024-25-a thla sarih (April-October, 2024) chhungin Taxation chuan chhiah Rs 6,46,53,71,317 (nuai 64,653.71) a hmu a; October thla bikah hian ṭum danga la tel ngai lo Social Infrastructure & Service cess leh Road Maintenance cess lakna a tel ṭan a ni.

April-October 2024 chhunga Taxation chhiah hmuh zingah Goods & Service Tax (GST) aṭanga hmuh Rs 5,62,22,27,519 (86.96%) a tam ber a; a dawttu Sales Tax aṭangin Rs 75,52,99,145 (11.68%) hmuh a ni bawk.

Chief minister Lalduhoma chuan October 17, 2024 khan a pisaa thuthar thehdarhtute a kawmnaah, tuialhthei aṭanga cess an lak zawng zawng chu mipui tan an hman vek dawn thu a sawi.

Chief Minister chuan, road maintenance cess chu kawng atan liau liau hman a nih tur thu te, social infrastructure & services cess chu sikul sakna atan te, additional classroom atan te, digital education system atan te, science laboratory atan te, slow learner centre atan te, technical college atan te, damdawi-in tihchangtlunna atan te, sub centre dinna atan te, hriselna lama thawktu lakna atan te, skill development lama ṭhalaite inzirna hmun tihchangtlunna atan te, women hostel-a thawktu tur lakna atan leh thil dang pawimawhahte hman a nih tur thu a sawi bawk.