Serchhipah Youth Centre tur lungphûm phúm

Mizoram Youth Commission (MYC) chairman Dr Vanlalṭanpuia, MLA chuan nimin khan Serchhip Darnam tlangah MYC Youth Centre sakna tur lungphùm a phúm.

Lungphûm puala Darnam YMA Library-a inkhawm buatsaihah Dr Vanlalṭanpuia chuan, Mizo ṭhalaite central service-a an tlin theih nan MYC kaltlangin sorkarin ṭhalai 20 a thlâwn veka state páwna coaching kaltir tum a nih thu a sawi a, "A kal turte zawnna hi December 2020 velah buatsaih theih beisei a ni. State chhungah offline coaching centre hmun pali-ah din tum a ni a, centre din turah hian Mizoram hi zone paliah ṭhen a ni," a ti.

Covid-19 vanga state danga hnathawk lo hawte ûm zuinaa hmalakna pawh chak taka bawhzui zel a nih thu sawiin MYC Chairman chuan, "Sipaiah kan ṭhalaite an luh tam theih nan training buatsaih ṭhin a ni a, Vairengtea inbun sipai training-na hmun ṭha CIJW-ahte training neihpui a ni ṭhin. Mizote hi Pathianin theihna ropui tak neiin min siam a ni," a ti a; MYC tum ber chu, Mizo ṭhalaite'n theihna an neihte tuai hriama tihpun zel a nih thu a sawi.

MYC Youth Centre hi NEDP leh SEDP aṭanga sak tur a ni a, Brilliant Consultancy-in thawk mekin, kum thum chhunga sak zawh tura ruahman a ni. A sakna atan cheng nuai 300 ruahman a ni a, a dung ft. 100 leh a vâng ft. 45 a ni dawn a; chowkidar quarters, mikhual 20 thlen theihna pindan, meeting room leh indoor volleyball court-te awm tura duan a ni.