Mizoramin kawlphetha MW 38 chauh a la siam chhuak thei - Power Minister

Power & Electricity minister F Rodingliana chu nimin khan New Delhi-a Power Ministers and Secretary Conference-ah a tel a; Mizoramin kawlphetha megawatt (MW) 38.5 chauh a la siam chhuah thu a sawi.

F Rodingliana chuan, Mizoramin fûr ruahtui tam lai chuan hydro electric power MW 3,500 chuang siam chhuah theihna a neih thu a sawi rualin, "Tunah hian MW 38.5 chauh kan la siam chhuak thei a, hei hi a chhan chu sum leh pai kan neih loh vang leh hmanrua kan neih ṭhat tawh loh vang a ni," a ti.

India rama state zawng zawngin anmahni pualin hydel project lian an neih vek tawh thu sawiin Rodingliana chuan, "Mizoram chuan hydro power siam chhuah theihna nei ṭha mah ila, tunah chuan hydel project tenau tê tê chauh kan la nei. Mizorama hydel project lian ber chu Tuirial Hydel Project a ni a, mahse, state sorkar ta a ni lo a, NEEPCO ta a ni," a ti a; Tuirial HEP aṭanga kawlphetha siam chhuah zinga 12% chu Mizoramin a thlawnin a chang a, a bak zawng chu NEECO aṭangin state sorkarin a lei thu a sawi.

Power Minister chuan, sorkar laipuia Cabinet-in tun hnaiah hmarchhak state-te tan hydro power tihchangtlunna turin sum leh paia puihna tur a pawm thu sawiin, "Mizoramin kawlphetha MW 3,500 chuang siam chhuah theihna kan neihte hi hman ṭangkai a nih theih nan sorkar laipui nen ṭha taka kan thawhho a, min puih ngei kan beisei a, central-in min puih hlan kan nghakhlel hle a ni," a ti.