CM-in Serchhip daia Entlang Ngaw a hawng

Chief minister Lalduhoma chuan nimin khan Nagar Van Yojana (Urban Forest) hnuaia cheng nuai 132 hmanga chei ṭhat, Serchhip daia Entlang Ngaw (Entlang Community Reserve) a hawng. CM chuan, hmasawnna hna thawk zel chungin ṭha taka ram humhalh tum a nih thu a sawi.

Thenzawl district forest officer R Lalnungrenga tarlan danin, Entlang Ngaw hi kum 40 chuang Serchhip YMA-in an enkawl tawh a, hectare 100-a zau niin, Nagar Van Yojana hmangin hectare 50 huam chinah thing eng emaw zat phun belh a ni.

CM Lalduhoma chuan, Serchhip khawtlangin sorkar chêt hma kum tam tak aṭangin ramngaw humhalh hna an thawk chu fakawm a tih thu a sawi a, "Ramngaw nei ṭha ram leh khua apiang kan la awt dawn a, vawiina bul ṭantute hi mi fing, hmatlir nei ṭha in ni. Kum tina lo leh huan hâl la bànsan thei lo mah ila, hmasawnna hnate thawk zel chungin kan ram hmun tam tak hi ṭha taka humhalh kan tum dawn a ni," a ti.

Entlang Ngaw humhalhna chuan mi dang ti harh se a duh thu sawiin Lalduhoma chuan, "Entlang Ngawah hian ram sa leh savate tla dul dul se, a en turin kan pan ruih ruih mai ang. He hmalakna hian mi dangte tiharh se, ram hmangaihna meichher hi Serchhip aṭang hian nasa takin êng chhuak thar se a duhawm hle," a ti bawk.

Khualzahawm Lalthansanga, Environment Forest & Climate Change (EFCC) minister chuan, Serchhip YMA-te nen pheikhai rual taka Nagar Van Yojana an kalpui thei chu a lawm thu a sawi a, "Vawiina kan hmalakna chin hi a thawh khatna chauh a ni a, a thawh hnihna a lo kal leh ang a, kan la chhunzawm zel dawn a ni," a ti.

Nagar Van Yojana hi sorkar laipuiin khaw chhunga ramngaw siam beihpui a thlakna a ni a, June 5, 2020 (World Environment Day) khan hawng a ni. Sorkar laipui chuan, a thawh khatnaah 'Kum 5 chhungin urban forest 200 siam ni se, sum leh pai chu Compensatory Afforestation Fund Management and Planning Authority (CAMPA) Compensatory Afforestation Fund (CAF) aṭanga pek ni se. Pune khawpuia Warje Urban Forest chu role model-ah hmangin khawpui dangah hmalak ve ni se,' a ti a; chu hmalakna hmang chuan Entlang Ngaw pawh kalpui a ni.

Thenzawl DFO tarlan danin, Entlang Ngawah hian Nagar Van Yojana hmangin ruahtui luang ral tur khâwlna tur hmun parukah siam niin, checkdam eng emaw zat siam a ni a; kea ngaw fanna tur kawng te, interpretation hall-te siam a nih bakah, tlang chhipa dil awm sa chu cheibawlin, a chungah lei (bridge) leh hmun dang pakhatah hruizen lei dawh a ni. A hungna leh gate ṭha taka siam a ni a, in awm sate chei thar a ni bawk.

INDIA STATE OF FORESDT REPORT - 2021

* Mizoram zau zawng aṭanga teha 84.53% chu ram hring (green cover)-in a la tuam.

* Ramngaw ṭha (very dense forest) erawh 0.74% chauh a awm.

* Hmarchhak state zingah Mizoram chu ramngaw ṭha nei tlem ber a ni.

* Mizoram zau zawng aṭanga chhûtin 56.68% chu rambûa (open forest) a ni.