PWD hnuaia hnathawhte thlir let a ni

Chief minister Lalduhoma hoin November 11, Thawhṭanni khan Secretariat Conference Hall-ah PWD hnawthawhte leh hmalaknate thlir letna (review meeting) hun hman a ni.

CM Lalduhoma chuan, thil dik lo zawnga department-te hmalakna enpui an nih loh thu sawiin, "Kan hnathawh hrang hrang leh kan harsatna tawhte inhriatsak nan te, chak zawka kan thawhho theih nante hetiang hun hi buatsaih kan ni," a ti.

Ṭhutkhawmah hian PWD minister Vanlalhlana leh PWD hotute bakah, an hnathawh nena inkaihhnawihna nei department - Environment, Forest & Climate Change minister Lalthansanga leh official te, Land Revenue & Settlement minister B Lalchhanzova leh official-te leh, Law & Judicial department aiawhte an tel a; PWD hnuaia contractor ṭhenkhat an tel bawk.

Ṭhukhawma tarlan danin, PWD hian SASCI hnuaiah project 126, PMGSY hnuaiah project 53, North Eastern Council (NEC)/NESIDS hnuaiah project 29, NEPD/SEDP project pakua, NABARD hnuaiah project 51, CSS project pariat, CRF/SCA hnuaiah project 10, MoRTH hnuaiah project 15 an thawk mek.

Lei (bridge) 21, mixed head hnuaiah project 10 leh sanction head 5,054 (Road & Bridges) hnuaiah project 192 an thawk mek bawk.

PWD hnuaia hnathawh mek zinga harsatna an tawhna project-te chipchiar taka tarlan a ni a; harsatna chinfel dan tur sawiho a ni.

Chief Minister hian chawlhkar tin department pakhat tal review meeting neihpui ziah turin ruahmanna a siam a; kar liam ta khan minister Prof. Lalnilawma enkawl department pathum - Horticulture, PHE leh RD department hnathawhte thlir let a lo ni tawh a ni.