November 14-ah Mizoram pumah Mock exercise huaihawt a ni dawn

National Disaster Management Authority (NDMA) leh State Disaster Management Authority (SDMA) chuan nimin khan Assembly Annexe conference hall-ah naktuka neih tur 'State level mock exercise on flood and disaster in Mizoram' atana inpuahchah nan 'Table Top Exercise Stage-2 of State Level Mock Exercise on Flood and Landslide Disaster in Mizoram' an buatsaih.

He hun hi Aizawlah chuan state level leh Aizawl District Disaster Management Authority kaihhruaina hnuaia incident response team (IRT)-te leh a kaihhnawih local council leh tlawmngai pawlte'n Assembly Annexe conference hall-ah an hmangho a; district danga DDMA leh IRT-te chu video conference kaltlangin an tel.

NDMA senior consultant (MEIRS) Brig. Ravinder Gurung chuan inlawmna thu a sawi a; DMR secretary K Lalrinzuali'n table top exercise buatsaih a nih chhan te, November 14, 2024-a Mizoram pum huap mock exercise neih tur chungchangte a sawifiah. NDMA member Lt. General Syed Ata Hasnain-in thuchah tawi a sawi bawk.

Naktuk Ningani hian Mizoram pumah mock excercise huaihawt a ni dawn a; tuilian, leimin leh kângmei chhuak vanga chhiatna thlenga chêt dan tur a taka tih a ni ang.

Aizawlah chuan mock exercise atan hian tuilian, leimin leh kângmei chhuak kaihhnawih chhiatna thlenna tur hmun atan Sairang, Seventh Day Hospital leh Vaivakawn-te ruahman a ni. Siren tihrîk a ni ang a, kawlphetha pawh tihtawp thut tur niin, kawngpui khâr (road block) leh thil dang thleng theite pawh a taka entir tum a ni.