Shalom Special School hnenah bus pe

Chief minister Lalduhoma chuan nimin khan a bial Serchhip khawpuia Shalom Spastic Society enkawl rualbanlo sikul, Shalom Special School hnenah mi 21 ṭhut theihna sikul bus (Force Traveller) a pe.

Lalduhoma chuan, sorkarin rualbanlote zirna lamah ngaihtuahna a sèn thu sawiin, "Kan unaute tana insengso a, theihtawp chhuah ṭhin mi tam tak kan nei hi Mizoram kan vanneihna a ni. Bus thar hi sorkar sum seng loin, rualbanlote hmangaihtu, in mamawhzia hretu ka ṭhiante'n an thawh khawm aṭanga an lei a ni," a ti a; Shalom Special School-in in saksaktu an nei chu ropui a tih thu leh 19th Assam Rifles chungah a lawm thu a sawi.

Shalom Special School hi kum 2005 khan din a ni a, school building chu Assam Rifles-in kum 2011 khan an saksak a, ei leh in turte an pe zui bawk. Sikul hi zirtirtu pathumin hlawh nei loin an enkawl a, zirlai 32 an awm mek a ni.